Plak iej oewen webkam al of? 

James Comey (rechts) zeg at leu öare egenruumte zelf beskaarmen mut. (foto: AFP/Stringer/Getty)
James Comey (rechts) zeg at leu öare egenruumte zelf beskaarmen mut. (foto: AFP/Stringer/Getty)

Earder van et joar maken FBI-direkteur James Comey de tongen lös duur too te gewen at hee den webkam van zinnen komputer ofplakket met plakbaand. Et is misskien verwoonderlik at den baas van et zogenaamd beste spionagekantoor van de wearld zulke McGyver-truuks mut oethalen, mer et slimste was, meanen völle leu, at hee earder zea at ze det juust neet doon mossen, um de nasjonale vealighead. De FBI mos met aandere wöarde dus aait zo mer in oewen komputer können as zee det neudig veunden.

Mer in een kuiervroagen met John Carlin, Assistent Attorney General van et Amerikaanse Gerechtshof, bleef hee et van zikzelf vuur nen bult volk neet bloots goodkuieren, hee veund ook at iederene det mos doon um de egenruumte te beskaarmen.

Toen as Carlin um vreug of hee nog aait zinnen webkam ofplakket, zea Comey: “Echt wal, oh echt wal!” Hee gavven too at ze um doarum “vuur gek zatten”, mer zea at et neet zo vrömd was at den direkteur van den FBI ook un zinne egenruumte gef. “Leu mut achter öare egene vealighead en beskaarming an.”

Oawer et ofplakken van oewen webkam zea hee: “der  zeent wat kloke dinge dee as iej doon köant en dit is der ene van.” Doarbie zea hee ook at hee bie de FBI lange neet den ennigsten was dee zelf an et knutselen warren. “Loopt een willekurig regearingskantoor in en iej zeet oaweral kleane kamera’kes op et skaarm met een lidken der op. Det kö’j ofsloeten.”

“Zo vuurkom iej at leu zoonder machtiging oe begloepet,” verkloaren hee.

In zinnen toosproak vuur et Strategies en Internasjonaal Oonderzeukssentrum reup den FBI-baas op um an oewe “beskaarmingshygiëne” te waarken en neet zo bleend te vertrouwen op oewe apparaten. Hee bedolen at vie et zelf mut regelen en neet annemmen at fabrikaanten oons digitale spölgood as vanzelf beskaarmet.


Duur Ben Taub
15 september 2016
Welle: iflscience.com

 

Geef een reactie

Het e-mailadres wordt niet gepubliceerd. Verplichte velden zijn gemarkeerd met *