Den twentsken insluup-R: unyk in Neaderland?
Den klank wår as y lüde in Neaderland et slimste met upporket is med afstand de R. Vulgens weatenskapper Koen Sebregts, den as der up afstudeerden, spreaket wy den by mekander up wal 20 verskillende wysen uut. En wy hebbet allemål starke vöärköären wu as et müt.
Vöär syn undersöök richeden Sebregts sik up 6 steyden in Neaderland en Belgie. Dår drünk hee koffy med willeköärige lüde en löät hee se verskeidene sinnekes vöärleasen.
Jammer genog spölleden sik dat allemål buten et neadersassiske deyl van Nederland af. Toch löt hee syne slotsummen der wal up slån. As hee nu in Enskede of in andere neadersassiske steaden koffy drünken har, was em nog wat moois upvöllen:
In Twente (en vaste ook wal dårbuten) küret de lüde non-rhotisk. Dat wil seggen dat se (in de meyste gevallen) den -r nit uutspreaket as hee nå nen klinker kümt. As vöärbeeld: darteen jår wörd uutspröäken as datteen joaah.
Dit is nog nit so ne grote verrasking. Wat dan wal? Dat et twentsk, lyk as et engelsk, nen linking en intrusive -r kent. Dat höldt in dat as nen -r in ne loupende sinne tüsken twey klinkers kümt, hee vöär et gemak toch uut espröäken wördt. Dissen -r verbindet de twey klanken an mekander. Dat skeylt een mål stotteren. Dat wörd mooi düdelik as wy et vöärbeyld van hyrboaven lük uutbreidet: hee is datteen joa-R-old.
Nog vrömder: in een paar wöörde kümt der inenen nen -r by in, dee as helemål nit by et woord höyrt! De insluup-R!
In et understånde filmken van Travelling Twents sint disse spreakwysen good te verneamen:
Vanof 1:01 minüte wörd der segd:
Wy gåt nu nå(r) de voagelkykhütte. Den is de(r) speciaal too-R-ezat, ümdat in dit nye natu(r)gebeyd hele speciale voagels, dee up de rode lyste ståt, hy(r) good terechte köänt…
En up 1:12 min:
Wårümme gå-R-y nu med up sonne tuur?
Ümdat et skynbår lastig is üm rechtstreyks van ne å når ne y te springen, drükked nen döärsnede Tükker der nen -r by tüsken. So hoov y nit te stoppen met geluud maken en kön y den -r bruken as treadplanke um makkelik van klank te wesselen.
Ouk in de twentske regiosoap Van Jonge Leu en Oale Groond reagent et insluup-r’en, te hören in et filmken hyronder. Wy geavet hyr vör uns eygene luie gemak eyn vöärbeyld.
Op 15:15 min:
“Ik sea-R-allenig…”
En up 17:12 min in datselvde filmken wörd et helemål bunt. Dår verandert Minie et sinneke “as hee nu…” in “arre nu“.
Mä dat hef wear ne andere oorsaak en is wear een ander verhaal.
