Barggorilla’s krupet uut et dal. Nit meyr ‘up punt van uutstarven’ nå slagede beskarmingspoging
Et antal barggorilla’s krupt wear uut et dal nå slagede pogingen üm se te beskarmen. Et Internationaal Verbund van Naturbeskarmers (IUCN), sea at se ’n ståtus van de deers wilt bywarken van ‘Up punt van uutstarven’ når ‘bedreiged’. Dit kümt döärdat der wear meyr as 1000 in et wild telled sint.
Toch kan de vlagge noch nit uut, meynet et IUCN. Se benådrükkeden dat de barggorilla’s noch altyd bedreiged sint en dat beskarmingsprogramma’s in warking müt blyven üm se te helpen oaverleyven. Gisteren köäm et IUCN med ne bywarkede Rode Lyste.
Dr. Liz Williamson van de IUCN SSC Warkgruup Primaten löyt weaten dat et belangryk blivt üm “turisten vort te holden en al et naue kontakt med mensken te vöärkummen” üm öär ne tokumst te verseykeren.
De barggorilla (Gorilla beringei beringei) is eyne van twey undersoorten van de oostelike gorilla (Gorilla beringei). In 2008 warren der döär ströyperye en andere skadelike handelingen noch mär 680 van oaver.
Den klim når 1000 is et höygste antal deers wat der van disse undersoorte ooit etelled is. Vöärbeylden van beskarmingspogingen sint vee-ärtse dee strikken vorthalet, mär ouk veldtöchte üm ströyperye teagen te gån.
Barggorilla’s leyvet in de Demokratiske Republik Kongo, Ruanda en Uganda. Mär in disse gebeden wördet vöäle ströyped, bured en et bevolkingsantal gröyet ouk noch altyd. Andere dreigingen sint under meyr menskelike seyktes as Ebola.
Dit was nit et eanigste positive nys up de rode lyste van et IUCN. Ouk de vinviske (Balaenoptera physalus) wör uphöyged van ‘bedreiged’ når ‘kwetsbår’, üm dat der werldwyd nu 100.000 leyvet. Dübbel so vöäle as in de 70er jåren. En ouk de Gryse Walviske (Eschrichtius robustus) geyt et temelik beater.
Toch blyvt der noch vöäle deers slim bedreiged. Volgens et IUCN ståt der nu 96.951 deersoorten up de Rode Lyste, wårvan 26.840 bedreiged wordet med uutstarven.
