Facebook hef nieje knöpkes

Facebook gef woonsdag ne nieje wieze van reageren vriej. (Foto: Facebook)

Vanof woonsdag den 24sten februwoari hef Facebook ne nieje wieze van reageren invoord. Iej hoowt non neet mear eankel een duumken te gewen, mer köant oet verskeadene stemmingen kiezen.

Vanof woonsdag
In öar blog löt et grötste sosjale netwaark van de wearld weten at alle aanderhalf miljard Facebookers vanof woonsdag de nieje knöpkes kriegt. Et kan eawen doeren vuurde’j ze zeet.

Zes knöpkes
In stea van et oolde duumke he’j rechtevoort keuze oet zes emotikons, woermet a’j alle geveul bie nen post angewen köant. Nöast et duumken kö’j non ook teunen de’j et grappig, verdretig, helligmakend of ongeleuflik veendt. Ook kö’j der een härtjen toozetten.

Passen neet aait
Facebookers wollen al earder wat mear geveul können teunen, want een duumke passen neet aait bie de oard van et bericht. Facebook hef det lange tegen eheulden, mer zea an et eande van 2014 det ze der oawer noa dachten.


Welle: http://www.nu.nl/internet/4219980/facebook-rolt-nieuwe-like-knop-met-extra-reacties.html

Oonze Bökkerd-lieste: 5 staarke kearls

Alleman wat der bie heuren wil, kuiert rechtevoort van ne Bökkerd-Lieste. Dan konne vie van Wearldsproake vanzelfs toch neet achter bliewen? Dus hier he’j oonze Bökkerd-lieste.

5. Arnold Schwarzenegger

Bökkerd Arnold in zinne gloriedeage. (Foto: thrillist.com)

Iej köant der van zeggen wat iej weelt, mer oonzen Arnold was in zinne gloriedeage met 1,88 meter nen fleenken kearl en neet vuur niks zeuwenvooldig Mr. Olympia. Schwarzenegger was op zin 22sten al miljonear. Doarnöast wus hee zik ook nog op te waarken töt gouverneur van den Amerikaansen stoat Kalifornië. Mer ja, a’j noar Amerika verhuust is et aait mer de vroage wat der van oew gezoonde leawen oawerblif.

4. Berend Veneberg

Bökkerd Bearnd dut hier radsmieten. (Foto: bd.nl)

Bearnd oet ’n Ham. Heel Nederlaand keant um, want hee was 7 joar lange den Staarksten Kearl van et laand. En met 1,85 meter ook neet echt een pooster. Rechtevoort hef oonzen Bearnd ne egene sportskole en een bevealigingsbedrief.

3. Jarno Hams

Bökker Hams dut boomstamburen. (Foto: wikipedia.org)

Met 1,89 meter is oonzen Vroomshoopsken Hams nen fleenken kearl. Hee dut nog aait döanig met in wedstrieden vuur Staarksten Kearl, en det is he dan ook al zeuwen joar ewest. Nog meuier, Jarno hef et wearldrekord bussleppen op naam.

2. Jón Páll Sigmarsson

Jón Páll Sigmarsson was veervooldig wearldkampioen in zinnen tied. (Foto: haskestrength.com)

Den Ieslaandsen bökkerd Jón Páll Sigmarsson (met bienaam De Viking) is oet egröaid töt et ikoon van beaide Staarkste Kearls-wedstrieden en Bodybuilding. Hee wör 4x wearldkampioen, Europees kampioen en pakten de Skotten ook nog es in op öare Skotse Highland Games. Hee gavven nooit op. Zin härte wal, toen as he 33 joar was.

1. Hafþor Júliús Björnsson

In de HBO-serie Game of Thrones spölt Björnsson “The Mountain”. As hee nöast Lena Headey (Cersei Lannister) steet, kö’j zeen woerumme. (foto: socialsports360.com)

Den Ieslaander Björnsson, den as (neet heel verwoonderlik) de bienaam “Thor” hef, is met 2,06 meter en 190 kilo met recht nen bökkerd. Hee was al es profesjoneel basketbalspöller, en wör Staarksten Kearl van Europa in 2014 en 2015. En hee spölden de rolle van Gregor Clegane (The Mountain) in de HBO-serie Game of Thrones. Björnsson mag op nommer ene umdet hee nog lange neet kloar is.

7 greuntes dee’j 1x anskaft en dan aait wier an loatt gröaien

Et is neet lastig um aait värske kruden in de kökkene te hebben. Völle plaanten skeett zo wier wörtel a’j ze in et water zett. Binnen de körtste moalen he’j der wier blad an. Hier he’j ne lieste van zeuwene van de beste plaanten dee’j in thoes steeds wier van niejs kweken köant. Nen neet-ophooldenden streum vitamines!

1. Leantesiepel

Leantesiepel gröait verdan a’j de wörtel in een gleasken water zett. A’j et mer in nen good lechten kamer zett.

2. Knoflook

Knoflook krig makkelik wier wörtel en gröait beheurlik a’j ze in et water zett. De stellekes hebt ne fiene smaak, woermet ze heel good in sauzen of salades köant.

3. Sjinese kole


Doompelt de wörtel van disse plaante in water en zet et in ne good lechte kamer. Loat et doar 1 töt 2 wekke stoan en zet et dan in nen plaantenpot. Der gröait zo wier ne fleenke kole oet.

 

 

4. Basilikum


As de basilikumskötten ongevear 3 töt 4 sentimeter laank wordt, zett ze dan in nen glas met water in rechtstreeks zunlecht. As ze ongevear twee moal zo groot zeent, verpott ze dan in oewen gaarden. Iej hebt al rap ne gezoonde, volgröaide plaante.

5. Sellerie


Sniedet de basis van de sellerie en zet et in een kummeken met laauw water. Zet et in de zunne. Vanoet et middeln gröait der wier blaadkes an. Dit kan eawen doeren. hiernoa kö’j ne wier in de groond potten.

6. Beendsload


Beendsload (mangs ook Romeinsen sload eneumd) gröait wier an a’j ongevear de helfte der van een dag of wat in water zett. Der komt meteen nieje bladen an. Dan kö’j ne in de groond potten.

7. Koriander

Koriander (mangs ook Sjinesen Peterselie eneumd) gröait ook gewoon wier an a’j ne in water zett. Noa een paar deage verpotten, doarnoa wier geneten van den feinen smaak!


Welle: http://pulptastic.com/8-vegetables-can-buy-regrow-forever/

 

3 tips vuur bettere smartphone-foto’s

Zowat alleman löp rechtevoort tooverdan met ne kamera in den tuk. Op alle tellefons zit der ene. Et is dan nog wal gin spegelrefleks, mer de technieken wordt verdan better. Instagram is hart oonderweagens um Facebook in te halen as meest bekekkene sosjale medium. Toch geeldt vuur fotografie etzelfde as vuur zovölle zaken: a’j der neet met köant, blif et een keukelspul.

Doarumme, hoold oe vaste, hier wat tips um oewe rapsnaps wat better te maken.

Tip 1. hooldt den eander rechte
Den eander (horizon, vuur de leu dee as gin Plat köant) helpt de harsens oew eawenwicht te bewoaren. steet den eander oet et lood, dan krig oons lichaam ne oproop um recht te goan stoan.

Den foto is skel en doarduur wat ongemakkelik um noar te kieken.

Mer met ne skelle foto kan det neet. Den blif skel, ook al kiek iej der op den kop noar. Zorget a’j oewen horizon dus recht hebt vuur röste an de ogene.

Hier is den eander recht. Wat ne opluchting. (Foto: Darren Rowse. Digital-Photography-School.com)

Tip 2. Gebroekt de Regel van Daarden
Al in de Middeleeuwen harren leu duur det a’j wat skilderden of tekenden, det et dan froai saai was at allens strak in et middeln steund. Doarumme wör de Regel van Daarden oet edacht.

Den foto leenks is neet met de Regel van Daarden emaakt. Et is lange zonnen interessanten foto neet as den rechtsen. (Welle: wikimedia.org)

Trekt deankbeeldig 2 vlakke lienen van leenks noar rechts oawer oew beeld, zode’j 3 eawen grote streppels kriegt. Doot dit ook in de leankte. Iej verdeelt dus oew beeld in 9 eawen grote blukke. In wat tellefonkamera’s zit dit reuster al standaard in. A’j den eander non op de eunterste of böawenste liene zett en oew foto-oonderwaarp op 1 van de sniedpeunten van disse blukke, wörd de foto völle meuier um noar te kieken. Iej köant ook oolde foto’s biesnieden töt disse verhooldingen.

Tip 3. Zorgt vuur kieklienen en verhoolding
Okee, iej hebt den den eander recht, allens verdeeld in 9 blukke, et oonderwaarp op 1 van de sniedpeunten… knips! Mer a’j kiekt, lik det dal lange zo depe neet as in et echt. Der zit ja niks in de foto woerlangs a’j ofstaanden köant inskatten.

Dissen foto is betrekkelik saai. De twee teurnkes stoat stief in et middeln, den eander strak op et middeln en et oge wörd neet echt de deepte in trökken. Der gebuurt neet völle in dissen foto. (Welle: Wikipedia)

Oaweral um oe hen zeent kieklienen. Dee stroate of det pad woerlangs a’j loopt. Twee grote keien langs de kaante. De rikken langs een gröslaand. Allemoal vertelt ze et oge wo depe of de foto is.

De rikken vormet hier ne dudelike kiekliene woerlangs as et oge van vuurten noar den veurtoornd achteran etrökken wörd. Den eander (strak op de böawente liene van de regel van daarden) dut etzelfde. (Welle: http://neibauer30.blogspot.nl/)

Bonustip. Bewaarket de foto eerst, vuurde’j ne postet.
Völle leu pleart zomear wat foto’s et net op. Doarnoa vroagt ze zik of woerumme of der gin meanske noar kik. Smartphonekamera’s maakt meestal wat vale, fletse foto’s. In Instagram kö’j al nen hoop biestellen an heelderhead, kontrast, wöarmte, verzöadiging en sfeer. Met ne app as Snapseed (vuur iPhone en Android) kö’j det nog wat better. Doot der wat met.

Bolivia’s tweede grötste mear is non ne dreugvlakte

22 januwoari 2016
duur Pedja Kalajdzic

Poopomear oetdreugd

1

Et satelietbeeld leenks teunt et Poopomear in 1986. Rechts is wat der nen moand terugge nog van oawer is. Foto: USGS/AP

2

Visker Valerio Huanca steet bie nen viskeboot op wat ooit den wal van et Poopomear was. Foto: David Mercado / Reuters

3

Nen visker löp vuurbie een stel boten dee as earder vuur de viskerieje broekt wörden. Foto: Juan Karita/AP

4

Oonderzeuk wis oet at miljoenen visken en hoonderden veugel dood zeent duur et verdwienen van et Poopomear. foto: David Mercado/AP

5

In et oawer eblewene van et döarpken Untavi geet oold-visker Cirilo Choque noar zin nieje woark as metselder. Volgens Reuters wonn der eerst 500 families in et döarpken, woervan as twee daarde vort is. Foto: Juan Karita/AP

6

Et mear wör veugelloos verkloard noa de oetdreuging in desember verleden joar. Mer duur wat reagen is der wier wat water, woerduur as de flamingo's oet et noabieliggende Uru Uru-mear zeent wier ekömmen. Foto: Juan Karita/AP

7

De umgewing, dee as vroger oonder ne grote watermassa lea, zut der non oet as ne löage weuste. Foto: David Mercado/Reuters

10

Et mear is wal es earder oet edreugd en toen köm et water wal wier. Oonderzeukers meant at det neet wier gebuurt. Foto: Juan Karita/AP

9

Visker Rene Valero op zinnen boot op et oetdreugde mear. Foto: David Mercado/AP

8

Foto: Juan Karita/AP

Et Poopomear besleug ooit meer as 2500 kilometer in et veerkaant, mer is non offisjeel oetdreugd. Doarmet verdreugden de leawensgroond vuur meerdere doezende leu, hoonderden veugel en miljoenen visken. – Det keump duur de opwoarming van de wearld, meant oonderzeukers.

Kleane viskeboten ligt der verloaten bie, skienboar middeln in ne dreuge vlakte. Kewers doot zik tegood an de mennigte visken- en veugelkadavers dee as grote delen van et laandskop bedekket. Oonder de hete zunne vechtet meeuwen um de leste kleane pläskes.

Et Poopomear, ooit Bolivia’s tweede grötste binnenmear, wör vurige moand offisjeel opdreugd verkloard.

40 deage leden nog water

Den umtrek wör bewoond duur ne gröaiende mienbouwgemeenskop, dee as van et mearwater ofhaankelik warren. Lokale boeren en gemeenskoppen as Untavi zörgden vuur den dageliksen kost, met bievuurbeeld visken en aandere waarken dee as verbeunden zeent an et Poopomear, volgens niejsburo Reuters, dee as de strekke in Bolivia’s zuudwestelike Oruro-distrikt bezocht hebt.

Een viskekadaver herinnert der nog an at hier nog neet zo lange leden water was. FOTO: DAVID MERCADO / REUTERS

– “Nog mer 40 deage leden was hier water, en flamingo’s. Der was roem water woer as non nog een paar kleane doonkere steas zeent,” zeg Valerio Calle Rojas, ene van de 150 viskers oet Untavi, tegen Reuters.

“De meeste leu zeent net as et water verzweunden. Edwungen um vort te trekken. Toen as et mear oetdreugden, zeent miljoenen visken dood egoan. Doarduur harren de veugel gin etten en zeent ongevear 500 eanden en flamingo’s dood, blik oet oonderzeuk.”

Den lokalen visker hef vief keender en dech der non oawer um etzelfde te doon as wat dree daarde van zin doarp – ongevear 500 families – de leste dree joar edoan hef: vluchten en vanniejs beginnen in aandere delen van Bolivia, in Argentinië of Sjili.

El Niño’s skoold

Et Poopomear lig 3700 meter boawen den zeespegel, in de korkdreuge hoogvlaktes oonder de Andes. Et mear hef dus al earder slachtoffer ewest van et grillige klimaat. Vuur 20 joar dreugden et mear ook zowat helemoal oet. Mer et water begun wier op te kommen en bedekten op zin meest 2500 kilometer in et veerkaant. Det gebuurt neet wier, meant oonderzeukers.

Visker Abraham Fulguera heuld zinne viskerkaarte in de heugte. Hee waarket non as bouwvakker in Untavi, terwiel as aanderen zeent vort trökken. “Ik hoppe a’w gin spookdoarp wordt,” zeg hee tegen niejsburo AP, dee ook in de strekke was. FOTO: JUAN KARITA / AP

Met det de ieskappen in de Andes verdwient, nemt ze ook de welle vuur et Poopomear met. Mer der spölt nog meer. De dreugte keump vuural van et wearfenomeen El Niño.

– “Vroger köm El Niño um de tien joar vuur, en doerden dan twee joar. Doarnoa har et Poopomear wier acht joar een normaal klimaat,” verteelt Milton Perez, professor bie de Universiteat in Oruro.

Mer duur opwoarming van de wearld en pasifiese streumingen keump El Niño non um de dree joar, volgens den professor.

– “Dus een joar met El Niño en dan een joar met La Niña en een joar met normaal klimaat. Doar hef et Poopomear neet genog an um zik te herstellen. En et wörd alverdan slimmer.”


Welle: http://www.nrk.no/urix/bolivias-nest-storste-innsjo-har-blitt-en-orken-1.12762803

David Bowie: stearnkeundigen neumt löchtenstearngroep noar ruumtegekken zanger

Et stearnbeeld steet ‘aargens kort bie Mars’, zegt de stearnkeundigen.
ofbeelding stardust for bowie webstea belgië
Nen greep van de Stardust For Bowie webstea, woerop de stearngroep steet zo as he vanof de wearld te zeen is. Hierop köant leu öare eare beteunen an den artiest. http://stardustforbowie.be/

moandag 18 januwoari
duur Andrew Griffin
@andrew_griffin

David Bowie hef zin egene stearnbeeld. Nen koppel stearns in de vörm van den oawerbekeanden löchtensflits.

Belgiese stearnkeundigen leaden de groep van zeuwen stearns vaste, dee a’j zeen köant “in de nöagte van Mars”, as een gedeankteken vuur den zanger den as verleden wekke oet de tied köm.

De löchtensflits was et eerst te zeen op Bowie’s gezichte op den umslag van zin Aladdin Sane-album. De stearnkeundigen hebt nen koppel stearns met denzelfden vörm vaste legd as eare.

Net as dee non-bereumde löchtensflits, vörmden de boeteneardse stearns en planeten vuur Bowie in zien hele loopbane ne inspiratiewelle. Vanof zinne eerste plate, Space Oddity, was hee drok met ruumtereaizen – en det bleef töt an ene van zinne leste filmkes wierkommen: Blackstar.

De stearngroepe is vaste legd duur et Belgiese MIRA Observatorium, wat zea at ze der waark van emaakt hebt um de gode stearns bie mekaar te zeuken.

“Et was nog neet eenvooldig um de gode stearns bie mekaar te treffen. Studio Brussel vreug oons um Bowie ne unieke plaatse in de Melkweg te veenden,” zea Philippe Mollet van et MIRA Observatorium.

“As verwiezing noar zinne albums he’w zeuwen stearns ekeuzen — Sigma Librae, Spica, Alpha Virginis, Zeta Centauri, SAA 204 132 en de Beta Sigma Octantis Trianguli Australis — kort bie Mars. De stearngroep is ne kopie van den bereumden Bowie-löchten en vaste legd op precies de tied at hee et leawen leut.”

De nieje stearngroep hef ne egene webstea, Stardust For Bowie. Dee webstea löt de stearns in de groep zeen. Leu köant öare favoriete muziek van Bowie binnen den vörm zetten. Ieder stipken stearnstof in den vörm is dan een iemand’s favoriete leedjen van Bowie.


welle: http://www.independent.co.uk/news/people/david-bowie-astronomers-name-lightning-bolt-constellation-after-space-obsessed-singer-a6819456.html

Dit is wellicht de nieje Einstein

Sabrina Pasterski
Sabrina Pasterski kan de nieje Einstein wean.

12 januwoari 2016
Duur Farah Halime

Ene van de dinge dee as de knappe köppe doot bie et Massachusetts Institute of Technology (MIT) – nöast harsenkraken oawer de samenhaank van et heelal en sci-fi masjienekes in mekaar knooien – is vleegtugen kuren vuur de federale oawerhead. Dus toen as Sabrina Pasterski op nen koolden januwoarimoarn de kampuskantoren binnentreud um ne OK te kriegen vuur een eenmotorig vleegtuug wat he bouwd har, kon et nen normalen dag ewest wean. Behaalve det de kardoeshöarige, grootogige vleegtuugbouwster 14 joar was en der al zelf met evlöagen har. “Ik geleuwen et eerst neet,” herinnert zik Peggy Udden, nen sekretoaresse an et MIT, “neet bloots umdet he zo joonk was, mer ook een meadken.”

Okee, et is 2016 en begaawde vrouwleu zeent neet zeeldzaam bie et MIT; zowat de helfte van de studeanten is vrouwe. Mer iets an Paterski zorgen at Udden neet bloots et vleegtuug leut goodkuren, mer ook det he andacht kreeg van de heugste professors. Non, acht joar later, hef de slaanke 22-jöarige Paterski al een MIT-diploma in den tuk en is he een Ph.D.-kandidoate an Harvard. Paterski löt de natuurkeundige wearld goonzen. Zee oonderzöch een antal van de meest oetdagende en ingewikkelde zaken in natuurkeunde, net as Stephen Hawking en Albert Einstein (van wee as zinne relativiteatstheorie net 100 joar oold is) vroo in öaren loopbaan deden. Paterski gref in zwarte geater, zwöartekracht en ruumtetied. Zee probeert oonder mear better begrip te kriegen van “kwantumzwöartekracht”, wat ne verkloaring mut gewen an zwöartekracht binnen de kwantummechanika. A’j doar wat in ontdekt, kon oonze kennis van et heelal wal es kats op de skuppe goan.

Op öare strakke website steet tusken de völle veardigheden: “de sierlikhead in de chaos veenden.”

Hee is non ook in de kieker bie NASA. Ook? Jeff Bezos, oprichter van Amazon.com en lochtvoartontwikkel- en -bouwbedrief Blue Origin, hef öar ne bane too ezegd zo gaauw at ze der kloar vuur is. Toen as OZY vanear in nen e-mail vreug of et anbod nog geuld, zea Bezos: “God, yes!”

A’j nen die-hard volger van natuurkeunde zeent, he’j wellicht eheurd van Pasterski en öare verslagen ezeen oawer semiklassieke Virasoriese symmetrie van de S-matrix van kwantum-zwöartekracht, of oawer Low’s halfleaidende zachte theorem as ne symmetrie van QED (beaide oawer maneren um den vörm van ruumte en zwöartekracht te begriepen en beaide de eerste twee verslagen dee as he ooit skreef). Hee is ne Cubaans-Amerikaanse dee as opgröaiden in nen vuurstad van Chicago. Hee hef gin Facebook, LinkedIn of Instagram, en ook ginnen smartphone. Mer hee waarket wal regelmoatig ne flantuutloze webstea bie met de naam PhysicsGirl. Doarop steet ne lange lieste van zaken dee as he doan hef en kan. Ene doarvan: “sierlikhead in de chaos veenden.”

Pasterski vaalt op tusken een gröaiend antal verske ofstudeerde natuurkeundigen in de VS. Der warren der 7329 in 2013, dubbel zovölle as de 3178 in 1999, et leegste in 40 joar, volgens et Amerikaanse Instituut vuur Natuurkeunde. Nima Arkani-Hamed, nen professor an Princeton den as de Fundamental Physics Prize wun (nen inwiedingspries van dree miljoen dollar), zea det hee “machtige dinge” heurd hef oawer Paterski van öaren adviseur, den Harvard-professor Andrew Strominger, den as binnenkort een oonderzeuk oetbrech met den natuurkeundigen superstear Hawking. Zee hef ook al hoonderddoezenden dollars an beurzen van de Hertz Foundation, de Smith foundation en de National Science Foundation ekregen.

Pasterski, dee as sprekt met rappe kuiersalvo’s, zeg at he aait an etrökken was töt et oetdagen van et onmeugelike. “Duur joaren de greanzen verleggen van wat ik bereiken kon, köm ik bie natuurkeunde oet,” zeg hee vanoet öaren sloapkamer op Harvard. Mer hee kuiert as of et gin waark is: hee neumt natuurkeunde “elegaant” mer ook vol “nut”.

Ondaanks öaren indrukwekkenden stoat van dienst, zat et MIT Paterski toch op de wochtlieste toen as ze zik anmeeldden. Professors Allen Haggerty en Earll Murman warren kats van et rabat. Udden har öar een filmken eteund woerop Pasterski öar vleegtuug bouwden. “Den moond völ oons nen eande lös toen a’w et zaggen,” zea Haggerty. “Wat zee allemoal geet können is ongekeand,” De twee deden een good wöardken vuur öar, woernoa as Pasterski der hen meug, en oeteandelik ofstudeerden met gemiddeld ne 5.00, et hoogst meugelike antal peunten an et MIT.

Pasterski is ennigst keend. Hee kuiert wat ongemakkelik en slot alle zinnen in öare e-mails of met smileys en oetrooptekens. Hee zegt det he een antal gode vreanden hef, mer nog nooit verkering ehad hef, alkohol edreunken hef of ne sigarette rookt. Pasterski zeg: “Ik bliewe lewer skoarp, en ik hoppe a’k bekeand stoa um wa’k doo en neet um wa’k neet doo.”

Ondaanks at mentors natuurkeundigen roem vuurspelt, blif Pasterski met beaide bene an de groond. “As nen theorist beweart at he wat spesjaals  oetdoktert oawer nen langen tied, kö’j der doonder op zeggen at et um neet lukket,” zeg hee. En ondaanks Bezos zin anbod is et plaatje vuur ofstudeerde wetenskoppers in de VS neet roosklurig: volgens et leste oonderzeuk van et Amerikaanse bureau vuur de stoatistiek krig mer 26 perseant van de ofstudeerde wetenskoppers waark in öar vakgebeed, terwiel as zowat 30 perseant van de natuur- en skeaidkeundigen bie de dure löp. Pasterski lik onverstoord. “Natuurkeunde is van zikzelf opweendend genog,” zeg hee. “Et is gin van-negen-töt-vief zaak. A’j meu zeent goa’j sloapen, a’j et neet zeent, doo’j an natuurkeunde.”


Farah Halime
Twitter: @farah_halime

Skriewster bie OZY
Farah is ne Brits-Palestiense in Brooklyn, den as nog aait de vrömde gebroeken van Niej-Yorkers probeert oet te veugelen. Öar woark is oet egewen in de New York Times, Financial Times en de Wall Street Journal. Ook hef he een blog met de naam Rebel Economy.

Welle: http://www.ozy.com/rising-stars/this-millennial-might-be-the-new-einstein/65094

Bouwvak 2016

 

Oawerzicht bouwvak 2016
Oawerzicht van de bouwvakaansies vuur de strekken Noord, Middeln en Zuud.

Bouwvakaansie 2016

Op dissen blog stoat alle Nederlaandse bouwvakwekken in 2016 vuur Noord, Middeln en Zuud. Dit zeent roadslienen, wat wil zeggen det oewen baas der zik neet an hooft te hoolden. Disse roadslienen zeent vaste legd duur de woarkgewersboonden in 2016. Vroagt oewen baas of dit oawerzicht ook vuur oe geeldt. As woarknemmer he’j wal recht op dree wekken achter mekaar bouwvakaansie.

Op papier besteet de verplichte bouwvak 2016 neet mear. Woarkgewer kan wal in oawerleg met de oondernemmingsroad of personeelsvertegenwoordiging bekuiern det et bedrief in et zommer dichte geet. De FNV Bouw is ook neet vuur verplichte vakaansies. Zee meant at alleman zelf mag weten wonnear of ze met vakaansie goat. De FNV Bouw wil oe good op de heugte brengen, vandoar dit oawerzicht.

Welle: http://www.schoolvakanties-nederland.nl/bouwvakvakantie-2016.html

Column: Ik zin machtig greuts det minne twee keender oonze sproake vlöaiend sprekt

Vriedag 1 januwoari 2016
Duur Bernard Dunne

Bernard dunne bie de opening van Gaelscoil na Giuise in Firhouse Community Centre met learlinge Alex Ni Cheallaigh. foto: Steve Humphreys. Independant.ie

Toen as ik as Ier in Los Angeles woonden in 2001, oontdekten ik wat slims an miezelf.

In LA wont nen hoop verskeaidene volker, liek as in Ierlaand rechtevoort. As disse leu oet verskillende leande nen aander van öar hoeslaand tröffen, gungen ze ogenblikkelik oawer op öare modersproake.

Ik veulden Naire – Kelties vuur skaamte  – toen ik inzaggen det ik minne egene sproake neet keanden.

Gaeilge is een apart geval. Et is de nasjonaalsproake van oons laand. Vie leart et vanof oons viefde en bliewt et 13 joar laank op skole learen.

De meesten köant et, net as ik, nog aait neet as ze van skole komt. Vie zollen de weankbrouwen optrekken as der oons ene op stroate zol ansprekken in oonze sproake.

Vie hebt dan smoesjes as det et zo zwoar te learen is, et wörd neet good oet elegd, et wörd oons op edrungen en vie köant der later slechter waark met kriegen.

Det leste smoesje is misskien wal et slimste vuur de sproake. A’w mut kiezen tusken de sproake learen van oonze vuureulders vuur een grötter geveul van greutshead en tooheuren, of ne sproake learen woermet a’w waark kriegt, is et rap dudelik woer as de leu vuur kiezet.

Greutshead, zelfbeeld of een geveul van tooheuren krie’j pas a’j wat eulder wordt.

Ik krege dit missende zelfbeeldgeveul in LA. Woerduur kon ik nen greutsen Ier wean?

Humor

Was et dee saamheurighead in oonze noaberskoppen, oonzen humor, oonze beroemde dichters en gelearden, oons mooie laandskop, of umde’w wearldwied zo good metdoot in de sport? Of was et det vie een vearkrachtig volk zeent, wat, ondaanks de völle tegenslagen, toch oonszelf wier oplapten met nen glimlach um den moond?

Det maakten mie greuts nen Ier te wean.

Mer oonze sproake is net zo belangriek vuur minne Ierse identiteat.

Et is net zo belangriek vuur oons laand as oonze muziek, de Gaelic games, keunst en et laandskop.

Ik mos de wearld oawer um dit in te zeen.

Jonge keender in de skole mut oonderdoompeld en oonderwezen worden in de Ierse sproake.

Ik hebbe et dan oawer keender tusken vief en twaalf joar, dee op de legere skole Iers kriegt. Doarnoa köant ze zelf weten wat ze doot, mer ze zöalt et vlöaiend können, zodet et in et voortgezet oonderwies een spesjaal bievak kan wean.

Disse oonderdoompeling in de sproake gef jonge leu een geveul van greutshead op öare sproake, kultuur en öar laand.

Dree joar terugge deed ik ne vuurstelling met de naam Brod Club.

Et was ne nasjonale kampanje vuur leu dee, liek as ik, hoaste gin Iers konden, mer dee öare sproake op basisniveau verbetteren wollen.

Töt de dag van vandeage komt der nog aait leu bie mie dee as met mie kuiern weelt met et kleane betken Iers wat ze keant. Meesttieds goat disse gesprekken der oawer det wollen det ze mear met öar Gaeilge doan harren.

Des Bishop (Nen Iers-Amerikaansen komiek – SW) deed machtig good waark vuur de sproake met zinne vuurstelling In the Name of the Fada.

Hee wonden vuur een joar in ne Gaeltacht (ne strekke woer as Iers kuierd wörd – SW) en leut zeen det zelfs ene den as gin Iers in skole leard har, de sproake toch oppakken kon.

Mangs deank ik det oonze vuuroordelen oawer de sproake oet et verleden komt en de verhalen woer as de keender met opgröait.

Ik meane det vie neet allene met de sproake noar et vuurliggende mut kieken, mer ook noar oons zelfbeeld. Der zeent völle nieje volker in Ierlaand en disse nieje Ieren kuiert völle sproaken.

De Ierse identiteat veraandert en wellicht ook oonze baand met oonze sproake.

Vie mut de sproake anjagen um met disse veraandering met te goan.

Oonze jonge leu mut mear kaansen kriegen um de sproake te broeken. Enen les van 40 minuten op nen dag, of um den dag, is neet genog um jonge leu et te loaten kuieren.

Ze mut inspirasie halen oet sosjale evenemeanten woer as ze de sproake broeken köant.

Sproake kan leu helpen zik mear met de kulturen van dit laand te verenigen. Mer ze mut de sproake op ne plezerige en oetdagende wieze vuur eskötteld kriegen.

Ik wete det wat leu meant at de sproake gin deel is van onze skolen, oonze leawens of oons zelfbeeld.

Mennige meansken mennige meaningen, zö’w mer zeggen, want ik veende at oonze sproake onwies belangriek is vuur oons laand.

Ik zin der greuts op det minne keender opgröait en oonze sproake vlöaiendig keant. En ik veende det et een gescheank is wat ze in öar leawen verdan opniej köant oetpakken.

et geet um et behoold van oonze kultuur, oons verleden en oonze indentiteat. Ik veende det ik doar, wo klean ook, zo an biedreage.

Is mise le meas. (Met vreandeliken groot – SW)

Oorsproonkelike stukke:
http://www.independent.ie/irish-news/im-very-proud-that-both-my-children-will-grow-up-fluent-in-our-national-language-34328545.html

3 neudige dinge vuur sproakbehoold

Gelearden beweart al mear as 100 joar at Saksies verdwient. Der vaalt oawer te filosoferen of det ne vaststelling is of ne hoppe op ne self-fulfilling prophecy, mer vie meant det et nog wal metvaalt. Et is ja 2016 en vie skriewt hier dit verhaal. En iej least et, wat angef det et oe angeet.

Loa’w non es nuchter ankieken wat der echt neudig is um dee sproake ook vuur 2106 (vie neumt mer wat) nog te behoolden.

1. Nut
Woerumme blif Nederlaands bewoard van oetstaarven en aandere Nederlaandse sproaken neet? Umde’j der wat met köant. Of better zegd: umde’j der wat met mút können. Alle offisjele  instellingen broekt et: de regearing, de skolen, de media, enzowiedter. Um doar met met te können, mu’j Nederlaands learen

Saksies loket in Riessen-Hoolten
An et loket in de Saksiese gemeente Riessen-Hoolten kö’j oewe zaken in nuttig Saksies ofhaandelen. foto: tubantia.nl

Toch mut der vuur dee instellingen bewust vuur Nederlaands keuzen wean; Nederlaands is ja van zikzelf oet neet better broekboar vuur regelzaken as aandere sproaken. Niks nuttiger dus. Zeker neet in strekken woer as ze hele aandere sproaken kuiert. Nederlaands is dus nuttig maakt.

skoolbröd
Nederlaands skoolbröd. Doar har ook Saksies bie op eköand. Foto: Noorderkrant.nl

Op de Nederlaandse skolen leart keender det Saksies gin nut hef. Et wörd der ja nooit kuierd en a’j et toch doot, krie’j der den board of. Of ze steurt oe noar nen logopedist. En Saksiese logopedisten gef et neet. Et steelselmoatig vortloaten van dee sproake en et ‘verbetteren’ löt de keenderkes weten det et vuur oonderwies en kennisoawerdracht neet broekboar en slecht is. Nutteloos.

Toch is der ook een positief geluud. In et Tweantse Riessen kö’j an et gemeenteloket met Saksies met oewe gemeentezaken terechte en ze helpt der oe ook gearne in. Op de webstea van et (Nederlaandstalige) DigiD kö’j bie oew curriculum vitae angewen det iej Nedersaksisch sprekt. It’s a start, zö’w mer zeggen.

Saksies kan dus ook nuttig wean. Töt wied in Duutslaand kö’j der oe met redden en der dus ook met haandelen.

2. Anzeen
Oolders wilt et beste vuur öare keender. Doarumme leart ze ze ne sproake woervan as zee meant at et de keender heugerop helpt. Ne sproake dee nuttig is. Ook as de oolders et zelf hoaste neet sprekt. Ze vergett hier aait bie det et Nederlaands der prima nöast kan. Et ene hooft et aandere neet oet te sloeten. Gevolg: de keender leart een mengelmoesken en wordt duur twee partiejen met et gat an ekekken, umdet ze van beade sproaken net neet allens keant. Ze bliewt met een keukelig akseant zitten. Faal.

Herman Finkers
Herman Finkers is wellicht wal den bekeandsten zönne van oolders dee as öare keender gin Plat learen wollen. Hee heul der zin kenmaarkende akseant an oawer. Duur hart studeren hef hee zik good Tweants Saksies egen maakt. En doar beheurlik wat anzeen met kregen. Foto: rtvoost.nl

Ne sproake krig mear anzeen as et vuur offisjele zaken broekt wörd. As iej der iederen dag op ieder vlak van et leawen met in anraking komt. Met aandere wöarde, as et normaal is. In et dageliks leawen, in de skolen, de media én in de oawerhead. Neet bloots in verskes, gedichten en beuke of in nen blaauwen boerenkiel in de plaatselike revue.

Ne offisjele stoatus vuur et Saksies zol dus mooi wean. Mer zoonder nut en vuural de wil van et volk he’j doar ook wier niks an. Van de aandere kaante kan et dee beade peunten wal anwakkeren.

Noorsken woarskouwing op sigarettendeuskes. “reuken veurt töt gevoarlike gezoondheadsskade veur die en diene umgewing.”

In de Haanzetied har Saksies zovölle anzeen in Denemaarken, Zweden en Noorweagen, det alle leu doar rechtevoort nog aait half Saksies kuiert. Zoonder det ze et nog weet. Det böd meugelikheden. Iej magt der dus greuts op wean. Et is nuttig um dee sproake an oewe keender duur te gewen, want doarmet köant ze eenvooldiger in Skandinavië en Noord-Duutslaand haandelen. Of de sproaken doar better begriepen en vlotter learen. Want et ene hooft et aandere neet oet te sloeten.

3. Wil
Dit is wellicht wal de belangriekste. Zoonder de wil um ne sproake duur te gewen heuld et al rap op. As oewe sproake nut hef, wil iej ne earder an oewe keender duurgewen. Der is ginnen readen um oewe sproake te verzwiegen a’j ne öaweral eawen good broeken köant.

As leu samen öare sproake öaweral vuur broeken wilt, dan krig et vanzelf nut. Want dan wil iej et ook op skolen en bie aandere regelzaken. Dan deank iej der geheels neet oawer noa of iej et wal of neet duurgewen mut. Dan doo’j det gewoon. Dit is de readen woerum of Freesken al wal ne offisjele sproake hebt in Nederlaand en Saksen nog neet. A’j wilt det oewe sproake blif, doo’j der allens vuur.

A’j dee wil trouwens te wied duurdriewt, wörd et kranghead. En det is vuur meardere partiejen in te vullen. Wo mear anzeen ne sproake bie de egene sprekkers hef, wo mear as ze meant at ze öare sproakwil duurdriewen magt.

In et kort haank dus de sproake of van de wil van et volk, wo nuttig et emaakt wörd en wovölle anzeen of et doarmet krig. Wil iej at Saksies in 2106 nog ekuierd wörd (in wat vuur vorm dan ook), dan mu’j et oewe keender willen learen. En proberen um oonze sproake mear anzeen te gewen en ne vaste stea in et dagelikse leawen. Kuieren dus. Mear is der neet van.