3 tips vuur bettere smartphone-foto’s
Zowat alleman löp rechtevoort tooverdan met ne kamera in den tuk. Op alle tellefons zit der ene. Et is dan nog wal gin spegelrefleks, mer de technieken wordt verdan better. Instagram is hart oonderweagens um Facebook in te halen as meest bekekkene sosjale medium. Toch geeldt vuur fotografie etzelfde as vuur zovölle zaken: a’j der neet met köant, blif et een keukelspul.
Doarumme, hoold oe vaste, hier wat tips um oewe rapsnaps wat better te maken.
Tip 1. hooldt den eander rechte
Den eander (horizon, vuur de leu dee as gin Plat köant) helpt de harsens oew eawenwicht te bewoaren. steet den eander oet et lood, dan krig oons lichaam ne oproop um recht te goan stoan.
Mer met ne skelle foto kan det neet. Den blif skel, ook al kiek iej der op den kop noar. Zorget a’j oewen horizon dus recht hebt vuur röste an de ogene.
Tip 2. Gebroekt de Regel van Daarden
Al in de Middeleeuwen harren leu duur det a’j wat skilderden of tekenden, det et dan froai saai was at allens strak in et middeln steund. Doarumme wör de Regel van Daarden oet edacht.
Trekt deankbeeldig 2 vlakke lienen van leenks noar rechts oawer oew beeld, zode’j 3 eawen grote streppels kriegt. Doot dit ook in de leankte. Iej verdeelt dus oew beeld in 9 eawen grote blukke. In wat tellefonkamera’s zit dit reuster al standaard in. A’j den eander non op de eunterste of böawenste liene zett en oew foto-oonderwaarp op 1 van de sniedpeunten van disse blukke, wörd de foto völle meuier um noar te kieken. Iej köant ook oolde foto’s biesnieden töt disse verhooldingen.
Tip 3. Zorgt vuur kieklienen en verhoolding
Okee, iej hebt den den eander recht, allens verdeeld in 9 blukke, et oonderwaarp op 1 van de sniedpeunten… knips! Mer a’j kiekt, lik det dal lange zo depe neet as in et echt. Der zit ja niks in de foto woerlangs a’j ofstaanden köant inskatten.
Oaweral um oe hen zeent kieklienen. Dee stroate of det pad woerlangs a’j loopt. Twee grote keien langs de kaante. De rikken langs een gröslaand. Allemoal vertelt ze et oge wo depe of de foto is.
Bonustip. Bewaarket de foto eerst, vuurde’j ne postet.
Völle leu pleart zomear wat foto’s et net op. Doarnoa vroagt ze zik of woerumme of der gin meanske noar kik. Smartphonekamera’s maakt meestal wat vale, fletse foto’s. In Instagram kö’j al nen hoop biestellen an heelderhead, kontrast, wöarmte, verzöadiging en sfeer. Met ne app as Snapseed (vuur iPhone en Android) kö’j det nog wat better. Doot der wat met.
