De 22 dikste wagens op de autoskouw van Paries
Verleden wekke pakken de Autoskouw van Paries oet met een antal hele vette wagens.
De tweejoarlikse Paris Mondial de l’Automobile teunt de leste ideejen en de dikste opvallers van de grötste automakers van de wearld. Et was een best joar vuur elektriese auto-ideejen, mer der komt ook nog zat aandere andachtstrekkende proonkepeardkes bie de dealers.
De Autoskouw van Paries 2016 is vrie toogaankelik tusken 1 en 16 oktober. Hier heb iej de 22 dikste wagens van dit joar:
As de eerste grote Europeaanse autoskouw van et seizoen, was Paries innömmen duur maarken van et vastelaand. Fraansken automaker Citroën treuk et slat van öare glatte CXperience hybrid Concept met een volelektries bereik van 60 kilometer.
Doarnöast köm Citroen met de C3 WRC Concept. Et is nen gleemp van de tookommende World Rally Championship-racer. Hee zal vuur et eerste metstrieden in de Rally van Monte-Carlo in januwoari 2017.
Den aanderen Fraansken automaker, Renault, har nen helen dikken elektriesen idee-auto, dee as ze Trezor neumt. Hee hef dree ofzeunderlike veurmodes: neutraal, sport, en autonoom. In meender as 4 sekoondes zit det moonster an de 100 km/u.
De Italianen maken de blits met ultra-zeeldzame Ferrari Aperta met lös dak. Der zeent der mer 209 van. En dee warren allemoal al vort vuur at ze bie de dealers steunden. Den Aperta pleart der op met 949 pk en nen topgaank van 350 km/u.
De Duutsers leuten zik ook good zeen van et joar. Mercedes en öare AMG-liene presenteren öare nog rappere versie van de GT sportscar, dee as ze de GT R neumt. Dit monster hef 577 pk en nen top van 320 km/h. Mer ze hebt der neet ene…
… mer twee, met ook de AMG GT Roadster.
Et maark proonken ook nog met ne extra staarke AMG-variaant van öare GLC Koepee. Doar trappelt 377 peardkes oonder de motorkappe.
Mercedes oonthullen ook nen vol-elektriesen idee-SUV, baseerd op de GLC. Dissen haalt 500 km en de eersten mut in 2019 roondjagen. Nöast öaren elektro-SUV, hebt ze ook …
… de E-klasse All Terrain-wagen. Dissen auto zit stoompvol zelfsteurende snufkes, zo as nen verkeervolger töt snelheden van 210 km/u.
Et verhaal is vanzelfs neet kompleet zoonder de Vision Mercedes-Maybach 6. Den hef vleugelduren en nen topgaank van 250 km/u.
BMW pakken oet met ne verbetterde i3 elektriesen stadswagen, met verbetterde kluren. Anvaank 2017 kö’j um kopen.
De MINI-ofdeling van den automaker har een niej waarkpeardke met de Clubman John Cooper Works-edisie.
Škoda, et kleane breurken van Volkswagen, oonthullen öare Kodiaq SUV zeuwenzitter. Et hef zelfsteurende snufkes, zo as ne slephulpe. As iej der ne koare achter hebt, helpet den auto oe inparkeren.
De langverwochte nieje Audi Q5 SUV-liene pakken ook oet. Ook hier zeent ze gek met et zelfsteuren, zo as de laanhoolder en filerieder. Hee hef töt wal 190 pk.
Porsche proonken met öare Panamera 4 E-Hybrid, met een vermeugen van 462 pk.
Volkswagen leut vuur et eerste öare elektriese idee-auto zeen. Dissen kan tusken 400 en 600 km jagen op ene oploadbuurte. Vanof 2020 kön iej um kopen.
De Britten maken indruk met öare strakke Discovery SUV-liene. De zeuwen steule kön iej verzetten met een veulskaarm of een appken op oewen smartphone.
De Japanners harren ook wat moois. Mitsubishi teunen öare idee-GT PHEV, ne hybride met een volelektries bereik van 120 km.
Honda foonkelen met öar Civic Type R-prototype — hoaste kloar in de volgende Civic-liene, dee as in 2017 te koop zal wean.
Hyundai leut öare i30 hatchback zeen. Te kriegen in 2017.
Infiniti proonken met öar QX Sport Inspiration-idee. Zo mut tookomstige QX-auto’s der oet kommen te zeen. Et hef gröttere raden (22 inch) en ne nieje strakgrieze lakloage.
As leste köm Nissan met öare nieje Micra. Disse hef laanhooldwoarskouwing en automatiese noodremme. Verkoop start in meart 2017, mer vuur wovölle weet nog nums.
Duur Danielle Muoio en Benjamin Zhang
30 september 2016
Welle: businessInsider.com
