Boote vöär Apple en Samsung weagens upsettelik vertrågen mobylkes
In Italye kryget beide Apple en Samsung ne boote van € 10 miljoon en € 5 miljoon vöär et upsettelik vertrågen van mobyle telefoons. Dat skrivt de britske krante The Guardian.
Uut een undersöyk van de italyaanske köäringsdeenst van waren in january dit jår blikt at de beide telefoongiganten mangs updates döärvöäreden dee de prestatys van et apparaat verslechtereden, so dat lüde eyrder nen nyen sullen koupen. Et undersöyk köäm nå klachten dat updates vöär öldere telefoons et apparaat tråger makeden.
Den italyaansken waakhund sea dat “Apple en Samsung unuprechte kommerciäle handelingen verrichted hebbet” en dat de systeemupdates “slim prestatyverlaegend warkeden, wårdöär vervangenden ankoup van de telefoon versnelled wör.”
Dår köäm noch by at de beide bedryve nit genog informaty oaver de updates egeaven hebbet en ouk gin möägelikheid eböäden hebbet üm et wearüm te draeyen.
By Samsung güng et vöäral üm de Galaxy Note 4, wår brukers ineynen software vöär de Note 7 up mussen installeren. By Apple güng et üm de iPhone 6.
Samsung protesteyreden teagen et besluut en untkenneden den anklacht. Apple gavven et too.
