Ny lecht in et mystery wo as de egyptenåren de piramides boweden
Med 139 meter was de Grote Piramide 3871 jår lange et höygste bowwark up de aerde. Meyr as 4500 jår eleyden wüssen se up de eyn of andere wyse grote steynblükke uut groves döär de wöyste te sleapen. Mär wodöänig?
Net up et noorden van et hüdige Luxor is ne vöärname anwysing untdekked. Archeologen hebbet ne helling evünden med an wearskanten trappen en ne heyle rygel gäter van pöäle. Dårmed wörden blükke uut ne steyngrove up ne sleyde heistered en med töwwe en mankracht up de höyvel etrökken.
Volgens Egyptes Oldheidsministery is et een simpel mär düdelik bewys van dit “unyke systeem” üm blükke te vervoren. Hellingen lyket ne vöär de hande liggende uplössing en archeologen gåt der ouk al jåren vanuut dat et piramidebowen so dån müt weasen, mär et is et eyrste mål dat undersöykers der ouk echt eyne vünden hebbet.
Ouk mooy an disse untdekking is dat der up syn minst 100 gravures van de warkers en öäre bowtyd langs de wanden ståt. De trappen en hellingen sint untdekked by Hatnub, wår ooyt ne grote grove vöär albaster was. De piramides sint vöär et gröätste deyl van kalksteyn, mär de beylden, vloren en wanden sint van albaster. De untdekkede helling likt uut de tyd van Köning Khufu te koamen in de 4e dynasty, wat mooy oavereyne kümt med de tyd wårin de Grote Piramide bowed is.
“Ümdat dit systeem wearüm geyt töt te minste Khufu’s hearskuppye, geavt dat an dat de egyptenåren in dee tyd al wüsten wu as se grote blükke med årdig stikke hellingen kunneden transporteren. Et kan düs good dat se et vöär disse piramide bruked hebbet,” beweyret Yannis Gourdon, co-direktöÖr van de gesamenlike missy by Hatnub, teagenoaver Live Science.
Uut öldere studys blikt ouk al dat et wårskynlik is dat de egyptenåren grote sleydes en töwwe brukeden üm de 2,5 ton swåre bowsteynder en standbeylden döär de wöyste te sleapen. Et is dan ouk wårskynlik dat se een beaten water oaver et sand uutgöyten üm de wearstand by et glyden te verminderen. Een handig trucjen üm et antal nöydige warkers te halveren.
Oorsprungelike artikel: Live Science
Döär Tom Hale
1 november 2018
Welle: iflscience.com
