D66 Oaveryssel: “Wat wil de provincy med de erkenning van et neadersassisk?”
D66 wil weaten wat provincy Oaveryssel geyt anvangen nu dat et neadersassisk as språke erkenned is. “Blivt et by ne erkenning of vattet wy et an med een aldaags gebruuk van et neadersassisk in et dagelikse leyven?” Dat vröägt D66-ståtenlid Jos Mooijwear sik af. Dee vråge hevt hee by de Deputeyrde Ståten vöärlegged.
Verleyden 10 oktober wör et konvenant Nedersaksisch underskreaven. Et Binnenlandsministery en verskeidene provincys en gemeendes beköyereden dat neadersassisk een ‘weasenlik, vulwaerdig en selvstandig underdeyl van et språkenstelsel in Neaderland’ is.
Mooijweer meynet dat et konvenant et idey geavt dat et neadersassisk nu oaveral erkenned wörd as officiäle språke en dat is nit good. Neadersassisk is volgens üm noch altyd ginne volwaerdige språke. Mooijweer: “Ik see et konvenant as nen mooien, volgenden trad en de andacht wat et neadersassisk med de underskryving kreagen hevt is unmündig good. Mär so lange as ik as oaverysselder noch steyds nit de eed of belovte in myne eygene språke mag afleggen köänet wy dat nauliks erkenning nöymen.”
“Et konvenant blivt uns dryven üm te probeyren ne volwaerdige erkenning der döär te krygen. Dårby is et belangryk üm te beseffen dat et neadersassisk ne ümgangsspråke is, ne leyvende språke. Et is van unwys groot belang dat et neadersassisk nit noch wydter in et kultuurhöykske dreyven wördet. Wy müttet et konvenant angrypen üm de verbreyding når et gebruuk der van in de dagelikse saken te söyken.”
Mooijweer vröyg al eyrder uut naam van de D66 Oaveryssel andacht vöär et neadersassisk. Hee deyd syne amtsgelovte as Ståtenlid in et freysk, as protest teagen et feit dat dat nit in et neadersassisk möcht.
