CDA-jungeren wilt neadersassisk in et underwys
De jöygdafdeyling van et CDA, et CDJA, wil at der meyr rüümte kümt vöär et neadersassisk in et underwys. Ouk wilt se at de oaverheid sorget at unse språke in et oupenbår bruked worden kan in Noord- en Oost-Neaderland. Dit wör verleyden såterdag beköyered up et CDJA-kongres in Amersfoort, volgens een artikel up RTV Oost.
Et besluut, med as titel ‘Hier kö-j plat proat’n’ [sic] van et CDJA Oaveryssel en Drenthe, wör presenteyred in de neadersassiske språke en med grote meyrderheid annöämen. “Disse resoluty kön y vanselvs nich in et neaderlandsk beköyeren,” meyneden Marc Smellink van et CDJA. “Dårüm do ik em in et twentsk”.
CDJA’er Smellink verneamt at völle jungelüde gin sassisk köänet. “Ümdat der noch mär 20 procent van de lüde en 5 procent van de kinder Plat köänet köyeren, mut der wal wat gebüren.”
Convenant eyrsten trad
De jungelüde seet at de neaderlandske regeyring med et convenant oaver et neadersassisk nen vöärsichtigen trad neamt, mär noch nit alle bepålingen uut et Europeesk Handvest vöär regionale språken nåleyvet. “Dårüm wilt wy dat der andacht vöär et neadersassisk in et underwys kümt en dat de regeyring et möägelik maket dat lüde informeel spreaken kan by instellingen in Noord- en Oost-Neaderland,” düt Smellink uut de döyke.
De junge lüde kryget stüt uut Brüssel. Europarlementslid Annie Schreijer-Pierik (CDA) maket sik der ouk druk oaver: “Plat pråten begint up skole.” See maket sik ouk sorgen dat de språke in Noord- en Oost-Neaderland händig an döär de achterdöäre glippet.
Nit bloots et spreaken van de språke is belangryk. “Et sassisk is nen vöärnamen draeger van de kultuur, bruken en traditys in Noord- en Oost-Neaderland. Dan mag nit verlöären gån,” meynet Smellink.
