Oordeyl: Narcos Mexiko – Ander land, selvden kråm (8/10)
Netflix syn Narcos Mexico volget Félix Gallardo (Diego Luna) tydens synen klim van unbedüdende weedverköyper töt ’s wearlds (tweyde) gröätste kokaïne-kingpin en de amerikaanske DEA syne strübbeling teagen de ströym van Mexiko’s korrupty in üm em te stoppen.
Üm te beginnen is et wat vrömd üm deselvde verteller te höyren den as ouk Narcos Colombia an mekander köyereden. Y verwachtet al half dat Agent Peña (Pedro Pascal) uut de eyrste ryge wear in beyld tredt. Toch müt et castingkantoor et grappig hebben vünden dat de höyvdpersoon van disse ryge, agent Enrique ‘Kiki’ Camarena, spölled wördt döär Michael Peña. Mär wat ne prima köäse! Peña syn akteerwark löt u Camarena’s wanhoop vöylen as he med ydere afleyvering meyr en meyr teagenwarked wörd, terwyl hee steyds verbeatener achter Gallardo angeyt.
De ryge is prachtig efilmed. Et glööyend hete, sweaterige en stovvige mexikaanske wöysteklimaat is håste vöylbår. De wöörde en dåden van de understüttende karakters låtet u verskeidene målen glimlachen. Vöäral Joaquín Cosio’s gewaldige versie van Don Neto, Gallardo’s persöynlik advisöör en ekstern geweaten, mag benöymd worden. Wy kennet allemål wal so’nen unwysen öym den as sik up feestkes nooit gedraegen kan, wårdöär et altyd mooi is üm der med up te trekken. Hee blivt natüürlik nen krimineel, mär tegelyk ouk een vaderfiguur den as (töt up seykere höygte) Gallardo en synen wilden weedbuur Rafa (Tenoch Huerto) in toom höldet.
Dat segd hebbende geyt de plotuntwikkeling van Narcos Mexico mangs so rap dat belangryke karakteruntwikkelingen der under lydet. Gallardo begint as nen sinaloaansken old-polityman den as med wat unskuldig weedverbowen vöär syne family probeyret te sorgen. Et volgende ougenblik seet wy em sonder ougenknipperen ymand afknallen sunder ouk mär een stipken skuldgevöyl. Syn beskeiden underkoamen in de sinaloaanske bargen wörd (my een beaten te) gau inwesseld vöär blinkende oaver-de-top kastelen an de küste. En terwyl as de verteller uutlegget dat mexikaanske regionale drugsbedryven slim lastig te vereynigen sint, krigt Gallardo et binnen eyn scene vöär mekander döär alle basen an ne köning Arthur-achtige runde tåfel te setten.
Toch is Narcos Mexico et ankyken meyr as waerd. Vöäral ümdat y weatet dat de geböärtenissen reydelik trow sint an et echte leyven. Et is angrypend as y inseet dat de untwikkelingen in disse televisyryge nen drugsoorlog afskilderet den as al sowat 40 jår duret en al dusenden unskuldige lüde et leyven ekosted hevt. As y wilt begrypen wo as de hüdige mexikaanske drugsdunderye unstån is, is dit nen dwingenden anvang.
8/10
Narcos Mexico is te seen up Netflix.
döär Martin ter Denge
19-12-2018
