Gek up Plat? 5 wysen üm et vaker te gebruken

Et imago van unse språke klåret med ‘n dag een beaten up. Lüde denket der vöörtan positiver oaver. Op 10 oktober 2018 wör et noch officiääl as språke erkenned in Neaderland en de twentske oldjårsconference was vöär de verandering vöär een groot deyl in et twentsk.

Mär is dårmed unse språke redded? Nee, dat hangt van de lüde selv af, of dee et dageliks bruket of nit. Toch sint dår noch heyl wat lüde hüverig vöär. Of se meynet dat se et “nit good genog” künnet en dat öär dat van alle verantwoordelikheid untdüt.

Wårümme probeer y nu nit es ne mini-upleyving under uwe family en vreanden up te wekken? Verjöärdag? Probeert es wat meyr sassisk te köyeren. Mengt der gewoon es wat wöörde döärhen en spitst u de oren as de ölderen köyert.

Hyr wat tips üm u up weg te helpen. So mööylik hoovt et nit te weasen.

1. Gewoon beginnen met kwaken

Ken y der eyne den een klein beaten Plat kan? Miskyn nen måt wår as y völle med in et kafee sittet? Of misschien ken je zo iemand die zijn of haar zinnen in het Nederlands begint, mär der altyd in snydig sassisk nen eynde an knooiet. Sprekket gewoon es af dat ylüde under mekander ouk wal wat Plat künnet köyeren.

Kyk, Michiel Veenstra, Matijn Nijhuis en Ilse de Lange deyden et ouk. Dat kön y toch better?

2. Set allens in wat y al kennet

Ken y et woord kearl? Of deernke of stute? Of weat y noch dat uw bröyrke u et vleisk van ‘n telder stöl? Wårümme set y dee wöörde nit dageliks in? Verbaset uselv en uwe family med wovölle Plat as y al kennet!

Cipel vöär ui, rechtevoort vöär teagenwoordig, centen vöär geld, of wat dücht u van nyjår vöär nieuwjaar?

3. PlatsApp

Streyet wat sassisk döär uwe WhatsApp-gesprekken. Bange vöär de Autocorrect? As y et vake genog invoort, leyret de Autocorrect et woord ouk en kün y et vaker bruken. Kün y de teakens nit vinden? Eaven de letter wat länger vaste holden, dan kümt der een menu’ke tevöärskyn med alle möägelike toostanden.

Wårümme nit standaard afsluten med heanig an of good gån of selvs Ajüüs! Binnen de körtste tyd geyt et heylemål vanselv.

4. Med Plat up ‘n trad

Up vakanty wal es fransken teagen ekümmen? Dee segget Bonjour. Altyd, oaveral en teagen ydereyne! Wårümme sullen wy dat nit doon? Antwoordet es med ‘ja ouk godendag’. Kyken wo’t se reageert. See y nen heyten italiaan underweg? Gybelt der lekker in et sassisk oaver med uwe vreandinnen (hoapen dat et nit per ungelükke ouk nen platsprekker is). Sin y selv wal es nen platsprekker teagen ekümmen in ‘n vrömden? Dat skeppet medeyne nen band.

5. Maket der een spelleke van

Ydereyne weat dat herhaling de beste leyrmeister is vöär språken, mär mangs heb y wat meyr nöydig üm et up gang te helpen. Wy sint gek up spellekes, mär se helpet u ouk by et leyren.

Plakket kleine breyvkes med sassiske wöörde up saken in en üm et huus. Of spöllet es Pictionary in et Plat. Let dan vöäral up et spelleke en nit up et sassisk, dan kümt et vanselv.

6. Organiseert ne SassenSessy

An de kökkentåfel med uwe family kün y al afköyeren wår en wonear y meyr sassisk gåt gebruken. Miskyn under et etten? As y med de kameröäde in de keet sittet? Wårümme organiseer y gin Pop-Up Plat-Party, een feest sunder kleyderkode, mär med köyerkode? Met een paar pilskes geyt et sowyso makkeliker!

Of as y der soavends eaven uutgåt of med uw bootcamp-gruupken. Miskyn sin y eyrst wat verleygen en is et noch wat vrömd, mär dat wennet gau genog. Untdekket selv wat good vöär u warket en kleppert lekker weg in et sassisk!


Selv ideyen? Låt et uns weaten!

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.