Investeyrders in kryptocenten köänet neet by € 166MLN nå dood uprichter
QuadrigaCX, de grötste kryptoböärse van Kanada, was et wachtwoord en herstelslöttel kwyt nådat uprichter Gerald Cotten verleyden december uut de tyd köäm.
Ungeveyr $190 millioon (ümmerekkend üm en nåby € 166 millioon) an kryptocenten ligt upslötten in een online swart gat nådat de uprichter van de böörse QuadrigaCX uut de tyd is ekömmen. Hee hevt dårby de verslöttelde toogang töt et geld in syn grav mednömmen.
Volgens een rechtbankverslag up CoinDesk, een nysbüro wat kryptogeld in de gaten höld, sea Cottens weddevrowe Jennifer Robertson dat de böörse noch C$ 250 mln (€ 166 mln) an geld en kryptocenten van klanten “in upslag” hevt.
Quadriga’s kryptocenten sint untooganglik wörden en een deyl kan selvs verlöären weasen,” sea Robertson in et verslag. Cotten (30) köäm verleyden december in India uut de tyd nå problemen med de seekte van Crohn, volgens et bedryv. Hee was in India “üm een weeshuus lös te doon üm underdak te beden an kinder in nood”.
Robertson, den as når eygen seggen gin andeyl in et bedryv hevt, sea at see allens al verskeidene målen oaver den kop trökken had üm et wachtwoord te vinden. “Ik kan by synen warklaptop, mär den is verslötteld ik hebbe de inlog neet en ouk ginne herstelkode.” Nu hevt see der nen IT-kündigen by haled, mär den is et töt nu too ouk noch neet lükket.
Undanks at Cotten störven was, bleyv et platform noch störtingen annemmen, töt de direktören dat up 26 january stopsetten. Up 31 january vröyg QuadrigaCX kreditörenbeskarming an by de högere rechtshov van Nova Scotia, nå månden van oavedrachtsvertrågingen.
Up 5 february wörd Ernst & Young anweysen as unafhankelik upsichter.
