15 thaiske verkesingskandidåten låt naam veranderen når den van vöärgangers

In ungebrukelike strategy neamet 10 kearls de naam Thaksin an en 5 vrowlüde de naam Jingluk, in poging herinnerenswaerd te weasen vöär stemmers.

Verskillende kandidåten in de upkoamende thaiske verkesingen hebbet öäre naams låten veranderen når dee van vöärmålige eyrste ministers. Twey månd vöär de verkesingen löpt et storm by de inskryvingsbüro’s. 6000 kandidåten hebbet sik anmeldet en nüms wil ne steyde in de regeyring missen. Dat steyt in een artikel up de britske The Guardian.

Volgens partyspreakster Ketpriya Kaewsanmuang hadden 10 kearls officiääl öären naam låten veranderen in Thaksin, når vöärmåligen eyrsten minister Thaksin Shinawatra. Vyv vrowlüde nömmen de naam Jingluk an, når syn süster den as ouk hölp in de regeyring.

“Se müt et heylemål selv weaten,” sea see, “en et is ouk nit teagen de wet of de verkesingsreygels. Ik kan öär natuurlik nit in ’n kop kyken, mär ik vinde et nit gek dat se makkelik herinnerd wilt worden.”

Eyne van de nye Thaksins, hyrvöär bekend as Jiraroj Kiratisakvorakul, sea teagen de Bangkok Post dat hee makkelik herinnerbår wil weasen vöär syne stemmers. Strikte verkesingswetten maakt kampagnevoren lastig. Up de eyrste dag van de kandidåtenregistraty skreyven 58 partyen sik in. In de anloup når de stemrundes up 24 maert köäm Thailand med strikte kampagnewetten.

Thaksin was eyrsten minister töt et leyger hüm der uutwippeden in 2006. Jingluk, den as van 2011 töt 2014 eyrste minister was, skynt et land uut evlüchted te weasen nå een uproop töt arrestaty teagen öär.

Volgens Thitinan Pongsudhirak, professor an et Instituut vöär Veiligheid en Internationale Studys, sul de naamsverandering weinig helpen en kun selvs negativ weasen. “Kandidåten sunder steavige basis of sociaal anseen hoapet dat disse naams rappe herkenning en begrip bevördert. “Mär se müt der döänig med uutkyken dat se nit under de kleine letterkes van de kampagnewetten valt. As se byvöärbeyld disse naams oapenlik gebruket, kan dat eseen worden as dat Thaksin of Jingluk selv van butenaf de saak beinvlodet. Uuteindelik kan et öär upheffing van de partye upleyveren.”