Möägelik ny medicyn teagen gehöygenverlees by ölderen

Ny medicyn kan möägelik gehöygenverlees teagengån. Undersökers uut Toronto in Kanada meynet ouk dat et kan helpen vöär nearslachtigheid, skitsofreny en Alzheimer.

Een testmedicyn wat swakke harsencellen verstarket hevt hoape wekked up ne kure vöär gehöygenverlees, minderde besluutvaerdigheid en andere geystelike hinderingen dee vake by ölderen vöärkoamet. Dat skrivt de britske krante The Guardian.

Et medicyn sul as dageliksen pil döär 55+ers nöämen künnen worden, as kliniske tests antöynet dat et een veilig en effectiv medicyn is teagen gehöygenverlees.

Tests med müse löyten al seen dat öldere deers binnen een halv uur nå inname van et medicyn sik dinge al beater herinnerden. Nå twey månd behandeling gröyeden krümpene harsencellen van de deers wear terügge, untdekkeden de undersökers.

Volgens Etienne Sibille van et Centrum vöär Verslaving en Geystelike Gesundheid in Toronto was de behandeling nit enkel vöär de “gewone” kognitive afbraak by ölderen, mär ouk vöär gehöygenverlees en geystelike kwålen dee vöärkoamet by lüde med depressy, skitsofrenia en Alzheimer.

As et medicyn good uut de tests köäm, kun volgens Sibille “ydereyne boaven de 55-60 med verstandelike problemen baat hebben by dit medicyn.”

Der sint noch gin medicynen teagen gehöygenverlees up höygere leyvtyd of by psychiatriske stoornisse as depressy en skitsofreny. Mär de undersökers meynet dat dat van öär falende gehöygens kan helpen döär speciale leyrcellen te behandelen en te verjungen. Et likt der up dat et gehöygenverlees by beginnende Alzheimer kan teagengån.

As et medicyn et good düt in tests med mensken kan volgens Sibille ydereyne boaven de 55-60 med verstandelike problemen der later gemak van hebben. Et medicyn kan möägelik helpen by leyren, gehöygen, besluutvörming en leyvensindeyling.

Undersöök når gehöygenverlees löt seen dat et te maken hevt med wovöäle neurotransmitters med de naam GABA een menske in et brein hevt. GABA-transmitters höyrt de måte wårin neurons versketet af te remmen, wårdöär feitelik elektrisken ‘ruus’ in et brein demped wörd. Döär dit achtergrundgeluud te dempen, köänet andere, belangrykere signalen verwarked worden, is de teory.

Et nye medicyn is ne afleiding van benzodiazepine, ne rygel medicynen wår ouk de anti-angstpillen Valium en Xanax by höyret. Mär wår as Valium en Xanax et brein breyd beinvlodet, richtet dit nye medicyn sik up een heyl specifik deylgebeed: de GABA-untvangers up neuronen in belangryke deylen van de harsens, so as de hippokampus.

By tests med müse in een doolhov bleak dat nå een halv uur up ne enkele behandeling de öldere deers al håste lyk so good presteerden as de jungen. Et medicyn hülp ouk junge müse wårvan öäre herinneringen tydelik blokkeerd warren döär de stress van een tydelik verblyv in ne krappe rüümde.

“Nen olden muus haalt normaal ne 50-60% skore up dissen test. Et warkgehöygen ‘warkt’ nit. Mär 30 minuten nådat se et medicyn kryget, skoret se 80-90%, håste et niveau van nen jungen muus,” sea Sibille teagen The Guardian.

Mär et wörd noch beater. In et lätste wark löyten de undersökers van Toronto seen dat krümpene harsencellen van öldere müse nå twey månd behandeling wear terügge gröyeden. “Wy köänet harsencellen låten angröyen,” sea Sibille. “Harsencellen krimpet med de jåren of by neurodegenerative seektes. Med dit medicyn gröyet se håste wear töt den ümvang van dee van junge deers.”

Vöär junge lüde dee nu meynet een pilleke vöär et studeren te künnen neamen üm stov better te untholden: “de pröve löyten gin verbeatering seen by junge deers. Et is düs gin studypilleke helaas,” sea Sibille.

De undersökers hebbet der underwyl patent up anvråged. Se wilt et nu up lüde gån testen, te beginnen by lüde dee last hebbet van nearslachtigheid.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.