Bernie Sanders kundigt tweyde poging amerikaansk presidentskap an vöär 2020
Bernie Sanders, den unafhankeliken amerikaansken senator uut den ståt Vermont den as in 2016 verlöär van Donald Trump, hevt ne nye kandidatuur ankundigd.
Dat löyt hee weaten in nen netbreyv an syne achterban up dinksdagmorgen. Sanders, nen selvverklården sociaaldemokraat den al sowat 30 jår as butenstånder in de politik sit, wil med syn kandidaatskap syne missy vulbrengen dee as hee drey jår terügge begün.
“Te houpe begunnen y en ik en unse kampagne van 2016 de politike ümmedraey,” sea hee. “Nu is et tyd üm et af te maken en de seenswyse döär te voren wår wy vöär vöchten hebbet.”
Sanders (77), den as sik as Demokraat upstelt, meynet dat hee kan oaverleyven in een druk en afwesselend kandidåtenveld wårunder verskillende vrowlüde en kandidåten uut minderheyden sint. Dårnå wil hee Donald Trump oaverstygen, den hee in synen netbreyv “den gevöärliksten president in de moderne amerikaanske geskydenisse” nömet.
Sanders is bekend üm syne vöäruutdenkende kandidåtspünten, so as Medicare-for-All (betaalbåre hülpe by seekte vöär alle amerikanen), een minimumloun van $15 in et uur, gratis les up hougeskolen, striktere måtreygelen teagen klimaatverandering en höygere belasting up rykere lüde.
Den Vermontsken senator wördt meyst understütted vanuut de bevolking selv. Hee geyt et reygelmåtig an teagen de gevestigde orde van grote bedryve en een händkevul ryken dee vöär een grout deyl de amerikaanske politik bestüret.
Gin enkelen anderen kandidåt steyt der nu al so good vöär as Sanders. In de eyrste runde van 2016 kreyg hee meyr as 13 miljoon stemmen en haleden sowat $230 miljoon an kampagnegeld up, et meyste döär kleine skenkingen. Syne tweyde poging richting et Witte Huus begint dus nit as politiken butenstånder, mär as houg-plaatsden kandidåt med grouten naamsbekendheid, ne toowyde achterban en ne unmündige lyste sponsoren.
Toch sal hee in de tweyde kampagne nöäder under et vergroutglas koamen te liggen. Eyrder van et jår veruntskuldigden hee sik al publikelik an syne vrowelike medwarkers nådat eyne van syne mannelike medwarkers anklaged wör vöär seksueel lastigvallen. Ouk hevt hee et noch vöärtan lastig by vrågstükke oaver ras, terwyl hee al jåren probeert der beater up te koamen by minderheidsgrupen.
Ouk sint der al behöyrlik wat andere kandidåten, dee der ouk nit slim vöärståt en dee minderheidsgrupen, vrowlüde en millenials anspreaket. Dårnöäst is syn leyvtyd een pünt van twyvel: in 2020 wörd Sanders 79.
