Opiumverslaavde parkyten verwoostet indiaske papavervelden
Indiaske papaverburen hebbet hülpe vråged by de regeyring ümdat öäre velden steyds plündered wordet döär opiumverslaavde parkyten.
De buren in den deylståt Madhya Pradesh segt dat öäre opiumoogsten verneeld wordet döär parkyten dee üm de sovöäle tyd wearkoamet üm high te worden. De buren holdet dag en nacht de wacht, mär de vöägel set allens up et spel üm öäre nebbens üm de papavers te krygen. Harte gelüden van luudspreakers en trummen skrikket de swår verslaavde deers ouk al nit meyr af.
De opium wördt verbouwd üm medicynen van te maken.
In een video up Twitter is te seen wo as de vöägel anvallet en der med de opiumkalebassen vandöär gåt.
“Eynen papaver leyvert rund de 20 töt 25 gram opium up. Y köänet u wal vöärstellen wat der geböäret med et veld as der nen heylen vlucht vöägel wal 30 töt 40 mål dagens up dale kümt. Dat is funest,” beskrivt nen opiumkweaker.
De deers vattet et klouk an. Se lyket te wachten töt de buren de kalebassen insnydet üm et rypingsverloup te versnellen. Dan kümt et sap vry. “Se holdet sik heyl stille as se dale koamet. Terwyl as de vöägel bekend ståt üm et vöäle kabaal wat se maket. Mär disse deers begint pas wear te skreeuwen as se vortvleget,” beskrivt eyne van de buren.
