5 “vergeatene” wöörde dee wy so wear bruken köänet

Vöäle lüde in Neaderland lyket noch altyd te denken dat neadersassisk een verbasterd hollandsk is. En dat et dårümme ouk so vöäle möägelik up hollandsk müt lyken. Terwyl as wy heyl wat unike wöörde hebbet dee as wy makkelik wear bruken köänet. Hyr heb y der vyve. Anvatten dan!

1. Huken

Wo nööm y et as y vanaf de knene en höyger döärsakket, terwyl as enkel de vöte de grund raket? Toch gin Dunglish squatten? Der is een mooi woord vöär: huken. Up de huken sitten. Denkt mär an et hougdüütske hocken.

2. Tuusken

Stelt u vöär: ik doo u wat in de hande, y doot my wat in de hande van lyke waerde. Wo nööm y dat? Ruiln? Oh nee, in “good plat” rülen seaker? hmm. Wat dücht u van et woord tuusken? Nooit van ehöyrd? Misskyn ken y dan et hougdüütske woord tauschen. En selvs ölderwetsker hollandsk had tuisen. Dat woord kön y so tuusken vöär ruilen.

3. Töymig

Et mooie van dit woord is dat y et up meyrdere wysen bruken köänet. Et kan löäg (nit vul), kalm, nit beysig, en warkloos bedüden. Düs as y es med yts gangs sint terwyl as der nen lambal med de handen in ’n tük by steyt te kyken, roop y: “hey ståt dår nit so töymig… helpet my nen tootast.” En dår hebbet wy medeyne et volgende woord.

4. Tootast

Letterlik ne toostöäkene hande. Wy kennet allemål vaste wal ‘döärtasten’. Düs dan is ’tootasten’ heylemål nit gek as y helpen bedoolt. Wydters kan et ouk noch een klein karweike bedüden. “Alloh, rüümt uwe skone es up. Et is mär nen tootast.”

5. Ettik

Ettik döär ’n moos. Lekker toch? Of een klein strötjen döär de waske üm de kleyder med skone te krygen. De meyste lüde nömet et rechtevoort azien of selvs azijn. En dat mag, want et skynt van etselvde woord te koamen: acetum. Dat wör fråy lange leaden verbasterd töt atecum. En selvs et hollandsk hevt noch et öldere woord ‘edik’.