Samsung stelt uutgave Galaxy Fold uut

Samsung wacht med officiele uutgave van voldbåren smartphone nå problemen med testers.

Een antal techverkenners dee ne vöärloupige uutgave van de Galaxy Fold in handene kreagen, gavven al gau an dat et skarm et begavven.

Dårup beslöät Samsung üm de plande uutgave van later disse weake uut te stellen.

Eyrste beoordeylings van de telefoons löät seen dat de problemen verband holdet med “te vöäle spanning up de ünderste en böävenste butenste deylen van et skarneer,” meynet Samsung. Ouk vünden se unbekende ‘stovven’ binnenin de Galaxy Fold.

“Wy gåt der med an de gang üm et skarm starker te maken,” seade Samsung. “Ouk sölt wy der düdeliker by melden wo gebrukers med et beskarmvelleken müt ümmegån en wo as se et apparaat underholden müt.”

Samsung hevt sowat acht jår an de Galaxy Fold ewarked. Baanbreakende nye gadgets höyrt by öäre strategy üm te blyven gröäien.

Koamende weaken kümt de süüdkoreaanske elektronikagroutmacht med nen nyen uutgavedåtum vöär de Galaxy Fold.