Undersöök: penisverlänging warket nit
Ingreapen sint gevöärlik en ‘müt y gewoon nit doon.’
Penisvergrotingen warket nit, sint ‘ineffektiv en riskant’ en geavt vöäle kearls fysiske en geystelike lyksteades, töynt undersöök an. Nen expert segt selvs dat se eygenlik håste nooit nöydig sint en kearls sik döär “bedregers” wat låt anküren.
Der is heyl weinig bewys dat de verskillende ingreapen dee as kearls köänet undergån vöär een grötter lid ouk echt dee uutwarking hebbet, segt britske undersökers.
De behandelingen köänet up allerlei wysen mis gån en bywarkingen hebben, so as blyvend gevöölsverlees, vervörming, verstyvingsproblemen of selvs verkörting. De meyste kearls dee sik toch låt behandelen sint achteraf untevreaden, blikt uut ne beskouwing van vrogere undersöken.
De bevindingen ståt in in een ny undersööksverslag in de Sexual Medicine Reviews. De analyse is leided döär Gordon Muir, nen uroloog van et King’s College-sekenhuus in Londen en undersökers van et Institute of Psychiatry, Psychology and Neuroscience van et selvde King’s College.
“Disse ingreapen müt håste nooit dån worden,” meynt Muir. “Se kostet mangs töt wal € 50.000,- en vake höldt kearls der nen vervörmden penis an oaver. Mär 20% is tevreyden nå de tyd.”
De undersökers keaken 17 eyrdere undersöken nå wårin 21 verskillende ingreapen teagen et lecht hölden wörden, beide chirurgisk en nit-chirurgisk, up 1192 kearls uut et Vereynigd Köninkryk en dårbuten.
De twey meyst vöärkoamende ingreapen sint underhuudse inspoiting in de penis en ne sonöömde gewrichtsbandinsnyding, wårby nen dokter et gewrichtbadweavsel boaven de penis insnidt en updeylt.
“De oavergroute meyrderheid van de kearls dee nen längeren penis wilt hebt ne lang sat, mär se meynt dat he te klein is,” segt Muir.
De meyste ingreapen wordt dån in privékliniken. Muir har gin good woord oaver vöär et “koppel bedregers dee profiteerden van unseakere kearls”, döär se ingreapen an te beden dee niks uuthaalt.
“Vöäle kearls dee nen längeren penis wilt hebt der eyne van gemiddelde längde of grötte, mär vöält der sik unseaker oaver. Helaas gåt een paar kliniken hyran vöärby. Privé-chirurgen müt der van af blyven. Et is verkeerd up alle fronten.”
Penisverlängingen sint meysttyds so simpel as ne herniahersteloperaty, dee ungeveyr € 3500 kostet. Toch weat een paar kliniken kearls so wyd te krygen dat se der töt wal € 50.000 vöär dale telt, weat Muir.
Een unbekend antal kearls dee disse behandeling wilt undergån hebt eygenlik last van morfodysfore stoornis (ingebeylde lealikheid) of ne erektystoornis, dee vake vöärkümt uut ne obsessive untevreadenheid med wo as se der uutseet.
“Wy meynet dat enkel kearls dee vulleydig up de höygte bracht sint van de möägelike techniske problemen en sik psychologisk hebbet låten nåkyken, der wark van sullen künnen låten maken.”
