Japan hellig oaver ‘sandgraffiti’ van touristen
Tottori-prefektüür wil meyr wårskowingsbrödte in andere språken
teagen duunvandalisme.
Lokaal bestüür in Japan trekket ne düdelike lyne. Et müt afeloupen weasen med butenlandske touristen dee maagdelike dunen an de küste untsyrt med graffiti.
Den gråfskap Tottori, wat an de japanske küste ligt, verböäd et al teen jår terügge, mär et lokale bestüür segt dat de ‘sandgraffiti’ de lätste jåren slim is tonöämen, ümdat der vöärt-an meyr butenlandske besökers koamet.
As måtreygel wilt se nu meyr brödte tosetten med wårskowingen in andere språken. Dat müt lüde afskrikken üm as perfekt Instagram-andenken de 16 kilometer lange dunen te gån verknoyen.
De lätste teen jår sint der meyr as 3300 sandgraffiti-vöärvallen weasd, wårvan 200 verleaden jår segd de lokale krante Mainichi Shimbun. In januåry must een butenlandsk koppel ne 25 meter lange spröäke “Happy Birthday Natalie” uutwisken. Andere boadskappen sint al döär lokale beambten en vrywilligers uutwisked.
De dunen, dee vöärt-an van vörm verandert en töt wal 50 meter houge köänet worden, sint oaver dusenden jåren untstån döärdat nen rivyr körtby uutmundet in sea en dårby sand uutstoat. Dat sand spölet dan wear an, wår de wind der dunen van blöst, vertelt japan-guide.com.
In 2008, do as et uut de hande begün te loupen, stelden et lokale bestüür ne boote in. Letters in et sand graveren kun u up meystens 50.000 yen (€ 406) koamen te stån. Mär den måtreygel likt töt nu to weinig effekt te hebben.
De Mainichi segt at lokale bestüürders meyr engelske chineeske en koreaanske brödkes wilt.
Touristengolv
Argernis oaver et dunenvandalisme steyt by up de groyende klachtenlyste oaver butenlandske besökers. Japan kan de houge toströym van touristen nauliks bybeynen.
Verleaden jår köämen der vöär et eyrst meyr as 30 miljoon besökers når et land. De regeyring wil selvs når 40 miljoon in 2020. In dat jår mag Tokyo de Olympiske Summerspöälen organiseren. Teen jår later müt der al 60 miljoon touristen koamen.
Winkeleers in Kyoto’s Nishiki-markt hebbet brödkes in meyrdere språken upehöngen med et versöök nit te etten under et loupen (een teaken van unbeleavdheid in Japan), nå klachten oaver afval up stråte en – minder anneamelik – sörgen oaver verwundingen van höltene etstökkes.
In de olde stad Kamakura hevt et stadsbestüür et loupend etten ne ‘publike argernis’ verklård, nå klachten van bedryven an Komachi-doristråte, wår volgens Jiji Press up nen goden dag 60.000 besökers döärhen busket.
