Belgiske monniken wekket 220 jår olde beersoorte töt leaven

Et hevt 220 jår eduurd, mär de monniken van et befaamde belgiske beermark Grimbergen hebbet de originäle bestanddeylen en braumetodes wearevünden in de archiven.

Dat et vöär de beerlevende belgen een grout ougenblik was, bleak wal uut et feit dat et officieel wör anekundigd döär kloosteroaverste Karel Stautemas, med den börgemeister van Grimbargen en 120 journalisten en leevhebbers der by.

“Et is et resultåt van veer jår undersöök når brautechnyken van et Norbertineklooster,” segt Stautemas, terwyl as hee et eyrste glas inskenket. De monniken brauden dår al eywen, vöärdat franske upstandelingen et klooster afbrandden in 1798. Et wör wear upebowd, mär de brauerye en receptüür verlöären acht.

Stautemas gavven to dat et wellicht better was nit te vöäle van den nyen olden beer te drinken. Der sit ja 10,8% alkohol in. “Mär eyne of tweye müt künnen,” sea börgemeister Chris Selleslagh van Grimbargen, et dörpke wår de brauerye steyt en wat up ungeveyr 10 km van Brüssel ligt.

Kloosteroaversten Karel Stautemas proostet med den nyen beer. (foto: Grimbergen)

Wearüm når den oorsprung

De nye mikrobrauerye is ebowd up deselvde steade as den oorsprunkeliken. Et idey untstünd döärdat se böke uut de 12. eywe wearvünden med informaty oaver de oorsprunkelike braumetoden. Med name döär öär gebruuk van hopsoorten in steyde van vergiste krüden warren de monniken öäre tyd wyd vöäruut.

By den brand in de 18. eywe wörden de böke redded do as de monniken een gat in de müre van de bibliotheek höwwen en noch rap wat böke medgadderden vöärdat et klooster in vlämme upgüng.

“Wy hadden de böke med olde recepten, mär nüms kun se leasen,” segt Stautemas. “Et was allemål in old latynsk en old neaderlandsk. Düs haalden wy der vrywilligers by. Dee bladerden ürenlange döär de böke en untdekkeden lysten med bestanddeylen vöär beer uut vöärgånde eywen, de hopsoorten, en de soorten tonnen en flasken.”

De monniken gebruket nit allens uut de böke. “Ik gelöyve nit dat de lüde de smaak van beer uut dee tyd good magt lyden,” meynet Stautemas. De ny anestelde braumeister Marc-Antoine Sochon segt dårby: “beer uut dee tyd smakeden eygenlik vöäral når stute.”

De nye brauerye geyt wear terügge når de beersoorte van een paar eywen wearümme, sunder tovogingen, med gebruuk van höltene tonnen en up lokale grund.

Volgens Stautemas leyrden se vöäral dat de monniken vöärt-an an et verbetteren warren. “Et recept veranderden üm de 10 jår.”

Groute brauers

Den nyen beer wörd emaked in samenwarking med groute namen as Carlsberg en Alken-Maes. Se gåt 3 miljoon glasen van 330 ml in et jår brauen, vöärnamelik vöär de belgiske en franske markt.

Stautemas is bly med de kommerciele samenwarking med groute brauers. Med de inkumsten kunnen de monniken et klooster blyven underholden, pelgrimstochten maken en “lüde helpen dee by uns ankloppet.”

Grimbergen

Grimbergen wör estichted in 1128 en brandden drey mål af, wårnå et wear upebowd wör. Vandår et fenix-logo en et motto ardet nec consumitur –verbrandet mär nit vergån.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.