Oordeyl | Undercover: De neaderlandske Tony Soprano

Ne vlaamsk/neaderlandske undercover-missy müt Ferry Bouwman underuut halen. Bouwman is leider van de grötste XTC-handel van de Benelux en ne ruwere versy van serylegende Tony Soprano. Vanselvs strikket de agenten sikselv meyr en meyr vaste in öär eygene web.

Et is verfriskend üm so ne gode vlaamsk-neaderlandske produkty up Netflix te seen. Et is vlot, mooi efilmd en good uutedacht. Mär mangs vråg y u af wo sükke kleine kriminelen et vöär mekander kryget üm eyne van de gröätste XTC-netwarken van West-Europa te leiden. Y sullen toch meynen dat se dan wal eyn of twey politikers of advokåten in de taske hebbet, mär niks der van. Ja, nen fråi nüttelosen politykearl. Mär so skynet de drugshandel in Europa te gån.


Wat van de karakters (ik kyke når u, Danielle en Jurgen) sint fråi undepe, selvs by et karikaturale af. Vöäral Jurgen, de heytgebakerde hülpe van Ferry en nit et helderste lecht, dead my wat te vöäle denken an den anderen bråbantsken klassiker: New Kids. Danielle is Boumans ‘trofeevröwken’, nit eseagend med et gröätste verstand, tevreyden med de luxe van et drugsgeld, mär anders fråy eynsaam med Khaleesi, een skefferig hündken. Toch gevt et de fråi dunkere sery wat meyr humor.

Dårnöäst steaket et mooi af teagen de prachtige, deper uutewarkede karakters van Ferry, Bob en John, perfekt uutebeylded döär Frank Lammers, Tom Waes en Raymond Thiry. Vöäral den lätsten mag afsünderlik ne veyre in et gat vöär syn unberispelike uutvoring van de altyd-achterdochtige, verneamstige en 100% trowe consigliere. Wat my angeyt lükket et em eandelik üm et ükkelige imago af te sküdden wat hee an Roos en haar Mannen en De Villafabriek oaver had ehölden.

Med Europa’s ryke kulturele verskeidenheid in et achterhöyvd kün y verwachten dat dit ne sery vöär språkgekken is. Dankens de oapen grensen köänet kriminelen makkelik med ne vrachtwage van België når Polen hen en wearümme sunder teagenehölden te worden. Ten minsten, nit döär grenswachters. Binnen twey afleaveringen höyr y vlaamsk, neaderlandsk, bråbantsk, poolsk, (akelig slecht) engelsk, spaansk, düütsk, fransk en selvs wat italiaansk. En al sint de gespreaken dan mangs wat vöärspelbår, de starke regionale aksenten geavt et een autentik gevööl. Ik müt seggen dat ik undercoveragente Anouk et minst oavertügend vünd, jüüst ümdat see der med öär afemeatene standaard neaderlandsk tevöäle uutsprüng (leas ylüde med, Hilversum?)

Vertrowen likt et gröätste tema in de sery, mär se koamet der nit vake up terügge en et is mangs behöyrlik makkelik ewünnen of verlöären. Wat filmtechnyk angeyt düt Undercover der wat an, mär ümdat de geböärtenissen mekander so rap upvolget is der weinig tyd vöär langsleapende scenes. Se maket mooi gebruuk van de kunstante spanning of de agenten untdekket sölt worden. Ydere afleavering eandigt med nen mooien kliphanger. En al sint der wat pünten van kritik, toch keak ik de heyle sery binnen ne weake.

Düs allens by mekander is de sery nit byster baanbreakend of deep filosofisk, mär seaker de mööyte van et kyken waerd.

8/10



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.