Kearl bedecht ‘periskoopbril’ vöär körte lüde up festivals

Nen untwarper uut Londen, Dominic Wilcox, hevt een periskoopbrilleke uutdacht wårmed lüde oaver andere lüde henkyken köänet by kuncerten, festivals en vöärstellingen.

Med den One Foot Taller-bril köänet gebrukers ungevear 30,5 cm boaven öäre normale oughöygte kyken. Dårmed steaket se dan boaven de höyvde van längere besökers uut dee der vöär ståt.

Et brilleke hevt een spegelke wat under nen hook van 45 gråd når boaven kikt en up een stängske een gröäter spegelke wat når vöärten kikt.

Den Periskoopbril (foto: Dominicwilcox.com)

Wilcox begün an et projekt doo as Microsoft Surface em uutdageden üm alledaagse problemen med bysündere uplössingen te verhelpen. By een kuncert sag hee nen körteren gast knooien üm wat van et spektakel med te krygen. Dat was syne inspiraty.

“Ik stünd by een kuncert en nöäst my was een klein vröwken an et dansen, terwyl as see de band nit kun seen döär et lange volk vöär öär,” legt Wilcox uut. “Dårüm wul ik een hülpstük untwarpen wårmed as lüde oaver obstakels as volk van boaven de 1,80 meater köänet kyken. Et ding düt good, mär der med dansen kan lastig weasen!”

Wilcox’ skepping is noch nit te koup, mär wör verleaden månd etöynd up de Extraordinary Solutions to everyday Problems-tentöynstelling up et D&AD Festival in Londen.

Wilcox studeerden by Londen’s Royal College of Art. Teagen de
Mirror sea hee: “Wat lüde kryget nen kick van bungeejumpen of ne winnende goale maken up Wembley. Ik kryge se van nye kreative ideyen.”

“Kreativiteit is belangryk. Der sint machtig vöäle problemen en uutdagingen in de wearld. Üm dee up te lössen sint wy vöäle kreative geysten nöydig. Ik denke dat ydereyne kreativer kan worden en öäre innovativiteit verhöygen.”


Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.