Guldene römiske münte in Noorddüütskland vunden – Vröögste archäologiske nåwys van eyn sassiske elite
Oaverset in holsteynsk dialekt döär Arne Waldemar Lentföhr.
Eyn hobby-archäologe het by Freenbeek in de düütske deylståt Neddersassen eyn besündere münte uut de late keisertyd vunden. Dat vertelde de baas van de museen van Stood in eyn pressekonferens. De neagen gram swåre guldmünte wyst dat afbild van de römiske keiser Konstans un worde 342/343 in Siscia (vandage: Sisek in Kroatien) slågen.
In de weatenskap wardet disse sorten münten “Multipla” nöömd un sint heyl råre versionen van normale geldstükker, welk blout uut besündere oorsaken ruutgeaven un van de keisers in eyn ceremony an hougstelde personen uutdeyld worden. Dat sint tomeyrst lüde weasen up welk de keiser trouwen müste un dee ear loyaliteet wichtig vöär em weer. Se kreygen disse münten as eyn teyken van vründskap. Multipla weren keen betaalmiddel. De besitter kunde dår syn eygen machtspositioon med wysen en stüt geaven.
De jåren üm 340 weren wrangelige tyden vöär dat Römiske Ryk. Konstans weer de jüngste söän van keiser Konstantin de Groute. Nå de doud van syn vader het hee toeyrst med syn bröders tohoup öäver dat heyle imperium regeerd, man med de seag öäver syn broder Konstantin II. worde hee de alleynige heyr in de westen van dat ryk. Sodännig is to verstån dat hee vreaden an de ousten kante van syn heyrskap wulde un alliancen med de germaansken völkers dår afslöyt.
De vund van dat multiplum in Noordneddersassen wyst nu dat eyrste mål up et bestån van eyn germaanske elite in disse kuntrei, dee mächtig noog weer van de römers better as vründ dän as vyend behandeld to warden. Jüst to disse tyd begün sik ouk de sassiske volksstam to bilden so dat de guldmünte eyn henwys givt up machtstelling un -organisatioon in eyn tyd, öäver dee wy keyn skrivtlike borns hebbet.
Med materiaal van
https://www.archaeologie-online.de/nachrichten/weltweit-einzigartiger-fund-bei-stade-4327/
