Dröygte: achterhookske en twentske mais- en grösougst in gevår

Döär anholdende dröygte koamet in deylen van Twente en den Achterhook (en Westfalen) de mais- en grösougsten in et gedrang. Vöäral bedryve dee beide vey en bowland hebbet, kryget et swår. Dat skrivt Tubantia.

Den mais steyt der up wat steydes in Twente en den Achterhook nit best by. Et is nauliks egroid en et blad krült sik üm so min möägelik vucht kwyt te raken. Buren sint bange vöär ne verlöären maisougst, wat se gebruket as beestevoder. Dårnöäst brecht et grösland ouk minder up. Se misset anderhalv töt twey sneydes.

Dat völet de buren in de knippe. As eyrste ümdat et grösland minder upsmit, mär ouk ümdat den maisougst to een deyl of meskeen wal geheyls mislükket. Buren dee as öär eygene beestevoder verbowet, kryget nen dubbelen knauw. Se misset upbrengsten en müt voder inkoupen.

Dat et der up wat steydes al twey meater houge upsteyt, segt niks. Et meyste water is nöydig vöär de kolven. Dee bruket et meyste water üm te groien en styvsel an te maken. Et beaten water wat der woonsdag völlen is, haalt nit vöäle uut.

Dusenden euro’s skade

Bert Schothorst uut De Lut seade at de skade van et jår up 20.000 uut kan loupen. Deyls ouk ümdat syne beeste döär de hette meyr vucht verlöären en minder melk gavven. “By my köänet maisplanten krap an in leaven blyven,” seade Schothorst.

De dröygte van verleaden jår was noch readelik up te vangen, ümdat 2017 een best jår was. “Dårdöär hadden wy in 2018 noch ne groute vöärråd, wår wy inmiddels nen flinken hap uutnöämen hebbet. Wy doot nu al voren uut de wintervöärråd,” gevt Schothorst an.

Hee sul gerne nen langen tyd med anholdenden reygen seen. “An ne plasse van 30 mm hebbet wy niks. Dat trekket medeyne vort. Der sit ging organiske stof meyr in den boadem, et is enkel sand. Den boadem kan et vucht nit good meyr vastholden.”