Vader en ses kinder skulet neagen jår in kelder vöär ende van de wearld
Rünerwold (Drente) – In et drentske Rünerwold is ne afleagene buurderye untdekked wårin as nen vader neagen jår med syne ses kinder sat underdöäken üm et ende van de wearld af te wachten.
De öldste söäne (25), verlöät de lätste pår dage meyrere målen de buurderye en meldden sik drey mål by een lokaal kafee, wår hee een totaal verward verhaal höldde. “Hee was unversorgd, had olde kleyder an en seade at hee noch nooit når skole weasd had,” sea den skapbaas, den as der subit de polity by haalden.
Dee döärsöchten de buurderye en untdekkeden achter ne kaste in de woankamer ne trappe når den kelder. Dår woaneden de vader en noch vyv andere kinder, tüsken de 16 en 25 jår old. See deaden selv öäre gröönte verbouwen en hadden eynen sik. Se hadden nooit eweaten dat der ouk noch andere lüde up de wearld woanet. Wår de moder is, weat de polity nit.
Volgens verslaggeavers van de NOS ligt de buurderye wyd terügge van de weg, halv versköälen in et bos. Van afstand is et net of der nüms woanet. Ouk in et drentske dorp wüsten de lüde der niks van. Nen nåber seade dat nen kearl et in et verleaden upeknapped had, mär wüst ouk niks van kinder.
De vader, nen kearl van 58 jår, is anhölden döär de polity ümdat hee nit medwarket an et undersöök. Hee leade up bedde en had når et skynt een harseninfarkt ehad.
Et gesin is tydelik in een vakantyhüüsken underbracht en kryget volgens de polity “alle sorg en andacht.”
