Amerikaansken cowboy vangt fytsendeev med lasso
OREGON (CBS News) – Do as hee underweg når de supermarkt was üm wat hundevoder te koupen, höyrden buur Robert Borba (28) ne vrouwe skreeuwen.
“Holdt em! Holdt em! Hee hevt myne fytse gapped! Hee hevt myne fytse gapped!” Den cowboy uut Oregon vertelt an CBS News: “En do keak ik ümme en saggen ineynen nen kearl vöärby sketen up ne fytse.”
Up beveiligingskamera’s is te seen at den kearl te hard güng üm ne te voot an te holden. Düs den cowboy deade wat cowboys doot. Te paerd sprüng he, med niks anders as ne lasso by sik!
“Een paar mål slingeren en dan smyten, net as by ne bulle,” seade Borba. “En den kearl so van ‘wat maak y dan, man? Heb y ne penning?’ en ik so van ‘nee, heb ik nit.'”
Borba belden Agent Chris Adams up. Den wüst nit wat he saggen: den gaudeev leade vöär de grund, vastebünden as ne koo den in de bak müt.
“Ik sul Robert medeyne as kollega anneamen,” segt Adams.
Borba: “Ik segge teagen den politykearl: ‘ylüde sullen es vaker med een touw warken en dat pistool der achterhen doon.” lacheden hee. “Meskeen he’j dan noch wal es meyr gelük.”
Volgens em was nen gaudeev anholden gewoon synen börgerplicht. “As et myne vrouwe of myn döchterke was, hoapeden ik at der ouk eyne klårstünd üm se te helpen as ik der nit by was.”
Do as den deev inreakend was, wul Borba der mär eyn ding vöär terügge: “myn touw.” Hee rulden et weader up, tikkeden an synen hood en reyde når de undergånde sünne.
