PODCAST | In gespreak med Sander Hunink: wår nye spreakers teagenan loupet

Ekoloog Sander Hunink is geboaren in Sütfen, upegroid in Daeventer en et twentske Veane. Toch hevt hee nooit good neadersassisk küren leyrd, terwyl as hee dat voordan belangryker vindet. Seaker nu as hee wat ölder wördet en selv kinder hevt, kümt de hang når syne kindheid up en de byhöyrende språke.

Verbünden vöölt hee sik et meyst med den neaderlandsken Achterhook. Mär üm dee språke te leyren müt hee heel wat hindernissen oaver. Nit in de lätste steade de negative holding van de spreakers selv.

Van de andere syde sittet lüde by dialektkringe vake med de handen in et (gryse) hår: wo kryget wy de junge lüde weader an et platküren? Vake probeert se mär wat, sunder de doolgrup selv te vrågen wat dee nu eygenlik belangryk vindet. En as se et al vråget, dan kan dee öldere garde meyst niks med et antwoord, want de generatyklouv is te grout.

Wat se dan doot is veilig vertrouwd dialektåvende en skryvwedstryden organiseren. Dat is ne mooie wyse üm lüde med de språke te låten warken, mär echt blyvend is dat nit. Et trekket altyd deselvde lüde an, ydereyne steaket mekander weader ne veader in et gat en de lüde dee as y WILT bereiken, de junge möäge, dee blyvet vord.

Met Sander Hunink bespreaket wy wat hee nöydig is üm beater sassisk te leyren küren, wår as hee teagenan löpt en wo as de vlagge der rechtevoort by hangt.