Vrouwe van 82 gevt inbreaker mål up den balg

ROCHESTER (NY) – Ne vrouwe van 82 uut et amerikaanske Rochester in den ståt Ny Jork den as an gewichtheffen düt hevt nen 28-jöärigen kearl afjacht geaven do as hee by öär wul inbreaken.

“Ik sin alleyne en old, mär ik seg u, ik sin so tå as hundeleader,” seade Willie Murphy teagen lokalen ümmeroup WHAM. “Hee is by et verkeyrde huus angån.”

Volgens Murphy kloppeden den jungen kearl an de döäre en seade at he seek was en eaven når binnen wul. Murphy belden medeyne de polity en löät em nit binnen. Do tröäd he de döäre in.

See greap et eyrste wår as se vat up kreag, een töäfelke med metalene pöyte, en güng der med “an de slag,” seade see. “Et töäfelken is kapot.”

Murphy besprüng den inbreaker, göyt em shampoo in et gesichte en höw em med nen bessem. Se probeerden em selvs uut huus te sleapen, mär hee was te grout.

“En ikke hauen, en hauen en hauen med den bessem,” seade se. Teagen de tyd at de polity en hülpdeenste köämen, “had ik den kearl flink te pakken ehad… ik denke dat he blyde was dat he med de sekenwage med kun.”

Murphy geyt sowat alle dage hen gewichtheffen by de lokale YMCA. Se segt at se 225 pund (meyr as 100 kilo) kan böären.