5 tips üm meyr neadersassisk te gebruken
Maert dialektmånd! Ne mooie geleygenheid üm meyr med unse språke an te vatten. Mär wat? Müt y nu allemål ineynen gedichtkes en leedkes maken? Mag, mär hoovt neet. Et belangrykste vöär et behold van ne språke is dat y em gewoon dageliks gebruukt! Dårümme hyr 5 tips üm meyr med sassisk te doon.
1. Machtig Plat Mailen
Stüürt es nen netbreev in et sassisk. As y weatet dat et bestemd is vöär eyne den as ouk sassisk (of limburgsk of freesk) kan, kün y best es up syn sassisk in de digitale penne klimmen. Maakt u nit te druk üm de skryvwyse. Nüms krigt der les in, düs allens mag.
Bange dat den untvanger et nit waerdeert? Dat weat y pas as y et probeert. Wo cool solde y et selv vinden üm nen platten netbreev te krygen?
2. Sassisk Vergaderen
Eyns in de sovöäle tyd kümt dat dumme plaatjen vöärby dat twentsk vergaderen sovöäle körter is. Wy solden seggen: probeert et es. En dan nit enkel med dumme klisjees smyten, mär der seriöös wark van maken.
3. Sassiske Socials
Et maket neet uut wår. WhatsAppt, Twittert, Instagramt, TikTokt, YouTubet, mär låt dee språke SEEN! Kyket vöär de wille ouk es under de hashtag #PLATTERFREITAG up Instagram.
4. Warket med an Wikipedia
Helpet med üm de wearld plat te maken. Dår sint een paar lüde al machtig druk med en dee köänet der wal wat händkes by gebruken. Sin y kampioon 100 meter pünniken? Alloh, bateren up dat tastatuur. Kün y üren küren oaver de paringsdans van de afrikaanske bargslakke? Mooi man, skryvt der es wat oaver in et plat!
5. Organiseert een Saskensjasken
Simpel idee, betten egapped uut de keltiske wearld, mär beater good egapped as slecht selv versünnen: oaverlegt med uwen skapbaas en organiseert nen platten oavend. Officiääl ankundigen dat sassisk de ümmegangsspråke van den åvend is. Gewoon skik hebben, nen mundvul drinken en sassisk küren. Wo moilik kan et weasen?
