Beermark en leaderwinkel nöömt produkt per ungelükke ‘skaamhår’ in māori

Beermark en leaderwinkel nöömt produkt per ungelükke ‘skaamhår’ in māori
Et woord huruhuru kreag noch nen lealiken nåsmak. (foto:Unsplash/Gerrie van der Walt)

Nen kanadeesken beerbrouwer en nen nyseylandsken leaderwinkel löyp et in den krül do as se öär produkt ne name in et Te Reo Māori wolden doon.

Den kanadeesken brouwer Hell’s Basement nöömden syne Nyseylandske Pale Ale Huruhuru. Nen winkel in Wellington, de höyvdstad van Ny Seyland, nöömden de heyle winkel der når.

“Wat lüde nöömt et waerdering, ik nöme et vereygening,” seade te reo māori-vöärstånder en TV-bekendheid Te Hamua Nikora up Facebook. Hee seade dat de meyste māori et woord ‘huruhuru’ gebröäken vöär skaamhår. Hee had de beide partyen aneskreaven üm se te wysen up öäre faute.

“As y leader verkoupet, nöömt et dan ouk leader. Nöömt et gin skaamhår, behalve as y ouk skaamhår verkoupet. Beer müt y ouk gin skaamhår nömen, behalve as y et maket van skaamhår.”

Ouk vröög he nit-māoribedryve üm saken in öäre eygene språke te verkoupen.

Den meduprichter van Hell’s Basement, Mike Patriquin, seade teagen RNZ, den nationalen ümroop van Nyseyland, dat et bedryv meynden at huruhuru ‘veader’ bedüden. Se wüsten nit at et stünd vöär skaamhår.

“Wy wüsten nit at et möägelik anstoatgeavend weasen kunde. Wy söält in de tokomst beater uns beste doon,” seade Patriquin. Ouk was et nit de bedoling üm de māorikultuur en -lüde der döär te halen.

“Dee was sik kleineerd vöölt bedet wy unse veruntskuldigingen. Wy vindt ouk niks beskamends an skaamhår, mär wy geavet to dat et meskeen nit best by beer past.”

Nen woordvoorder van de leaderwinkel in Wellington seade ouk dat se niks gin kwåde bedolingen hadden med de name van öären winkel en dat see ouk wol, veader of vacht bedoolden.

Aynur Karakoc seade dat et bedryv selvs tostemming had van den māori-advysråd van et Kantoor vöär Intellektueel Eygendom. Geld vöär ne naamswysiging hadden se nit.

Twey jår terügge güng Coca-Cola noch in de faute do as se māori en engelsk wolden gebruken. See skreaven “Kia Ora, Mate” up nen bliksautomaat. Se vergatten dat Mate (engelsk vöär måt, kameråd) in et māori ‘Doud’ bedüdet.

reklame – FRESHTEXT.NL

admin

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.