Bob Dylans Desolation Row up syn twentsk

Bob Dylans Desolation Row up syn twentsk

Darteen twentske skryvers maket eygenen twentsken tekst up wearldbekend nummer, inesüngen en espöäld döär Martin ter Denge.

Oaver et nummer Desolation Row van Bob Dylan wordt heyle literatuurkolleges geaven üm den tekst te düden. Med meyr as 11 minuten is et Dylans längste en wellicht ouk meystbespröäkene nummer. Den tekst steyt vul med verwysingen når bybelske en mytiske verhalen, lüde uut Dylans leaven en geböärtenissen up et wearldtoneel rund de tyd at Dylan et skreav. Et dröäg der selvs an by at Dylan de Nobelprys vöär Literatuur wun.

Darteen skryvers

Vöär et Jårbook Twente nöm Gerrit Lansink et up sik üm darteen twentske skryvers en kuplet te låten maken oaver öäre eygene gemeynde. Dårin ståt verwysingen når lokale lüde en geböärtenissen, wårmed de geyst van Twente vüngen wördt. Et vangt an med et kuplet oaver Hengelo van Fred van de Ven, den as eyrder dit jår uut de tyd köm döär Corona. “Dat vünd ik en passend eyrbetoun,” geavt Lansink an. Et was Van de Ven syn lätste wark.

De andere kupletten warren van Gerrit Dannenberg en Arie Jansen uut Ryssen, Martin ter Denge uut Ryssen, Alie van der Veer uut Twekkel, Mariska Overman uut Hengel, Gerrit Klaassen uut Albargen, Gerrit Lansink uut Enske, Theo Vossebeld uut Beckum, Laurens ten Den uut Enske, Bennie Waanders uut Håksebargen, Ben Siemerink uut Oldensel, Herman Kampman uut Heldern, Goaitsen van der Vliet uut Enske en Bennie Sieverink uut Hassel.

De twentske versy duurt twey minuten länger as et origineel. “Der sint nu eynmål darteen twentske gemeyndes en eyn kuplet duurt ungeveyr ne minute,” weat Martin ter Denge (34) den as de musikale uutvoring en en kuplet oaver Ryssen vöär syne rekkening nöm.

Martin ter Denge (foto: Gerieke Pluimers)

Verskillende dialekte

Med et singen van de verskillende dialekte had Ter Denge gin moide. “Ik hebbe gewoan evolgd wat der up papyr stünd. Mangs ne keyr nich singen insteade van myn eygen neet vind ik neet sou slim. Sou völle verskil is der nu ouk weader neet.” Lansink düt der by: “Et is my gin ougenblik upvöllen.” Ouk de rest van de skryvers was te passe med Ter Denge syne uutvoring.

Den uutvoring is hyr te belüsteren:

admin

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.