Assassin’s Creed Valhalla review: bewulked med kans up beerhalle ****

PS4 en PS5, Xbox One, Xbox Series, PC; Ubisoft
Et weader is noch altyd slecht, mär disse kloke, verneamstige en grappige openwearldgame is ‘n wår Vikingavontuur

Döär Tom Bramwell
10 november 2020

Et güng der van dit jår. Mär y köänet u altyd verlåten up Assassin’s Creed vöär wat verlechting. Låtet wy es kyken wat dee gekke geskeedkündigen by Ubisoft weader terechteknooid hebbet in de spannend enaamde Assassin’s Creed Valhalla… Peterborough, echt? Norwich in de middeleywen?

Ik hebbe niks teagen unse mooie katedrålstäden, sacht-gulvende vlakdes en park+ride-deenste, mär nå 12 månden Brexit, COVID-19 en buskbranden, plus de aflasting van et Eurovision leedkesfestival, hoapeden ik up ne wat minder swåre hindernisbane in disse düselingwekkende, quasihistoriske akty-avonturenryge, wårin as wy vöärige mål al döär Atlantis güngen polteren.

De eyrste paar uur val y middenin et yskolde politiske drama van neagende-eywsk Noorweagen, wåras vikingkryger Eivor rundbusket oaver sneybedekkede eilanden en swåre gesprekken hevt oaver de tokumst van öäre stamme. (Y köänet as mannelike of vrouwelike versy van Eivor spöllen, of et spel sal selv mangs tüsken de beide wesselen. Ik köäs vöär de vrouwelike Eivor.) Disse uutgebreide inleiding vöölt ‘n beaten as ne skandi-Phantom Menace. Nå nen set geavet Eivor en öären broder Sigurd et up en beslutet üm in Engeland ‘n ny leaven up te bouwen. Dat is mär et beste vöär ydereyne.

Allens wördt beater as y når Engeland gåt (behalve et weader). Eivor en Sigur stichtet de neadersetting Ravensthorpe en trekket richting Mercia, Oustangelen en wyder üm verbunden an te gån. Unvermeidelik kum y dan langs pittoreske landskappen (of y seilet rivyren af in uw langskip) terwyl as y andermans problemen uplösset, bute versamelet, en karken, klippen en romeinske ruines beklimmet.

An et olde Egypte en Grekenland hadden wy makkelik vermaak, of y nu under den Sphinx döär tunnelden of an de uutbeitelde penis van en Zeus-standbeald hüngen, düs de middeleywen hebbet noch wat te beden. Mär terwyl as dissen uutgebreiden spölhov minder upvallerig is, wördt he al rap wat meyr verheaven. Andachtspunten up de kaarte gåt u beheyrsken. ‘n afeslötten gebouw wat y lös mut seen te purken med lateraal denkwark, nen kearl den as ‘n töyveldrank verkoft wat unmiddelliken rykdom beloavet, of ne lappe stof wat tovallig boaven ne hindernisbane hangt.

Ik sin gewend eraked üm up de automatiske piloot döär uutstrekkede open wearlden te trekken üm teykens up ne kaarte up te rümen, mär dit likt toch meyr up verkenning. Et is mangs wat herhalend, jå, mär ouk vernyend.

Der sint sat kleine dörpe üm te plünderen, mär dat geldt nu as nen vikinganval. Y våret uw skip in de drek, tutet up uwen hoorn en trekket der up uut üm wat af te hauen. De hand-töt-hand gevechten sint uwe gewoanlike duken en afweyrbeweagingen, mär der sint wat feine nye tovogingen as dubbel-hauen, wårmed as et vechtritme wat anders wördt. Y köänet ‘n belachelik anbud an speciale anvaltechniken vryspöllen en an uw eygene arsenaal tovogen. En dee holdet nu ouk verband med verkenningstochten en når ‘n volgend level gån, wat ne mooie verandering is. Verstekken in de büskes en vyanden markeren vöärdat y der händig med afwarket is lastiger, mär et ünderstreypet de kracht van disse nye benöädering van vechten dat ik dat al rap vergeaten was.

Ouk al müt y nen eande van de köäken vöär dit spel, an de krygsbute heb y et meyst by huus in Raventhorpe. As herinnering an Assassin’s Creed II’s geleevde Monteriggioni kön y hyr ne smidse bouwen, ‘n Hidden Ones-huus vöär moordenaars, ne jagdhütte, nen Bakker Bart en noch vöäle meyr. Okey, meskeen ginnen Bakker Bart. Med nye gebouwen en intrekkers kön y nye dinge doon in de wearld. En in Raventhorpe kön y uwe versameling tuusken (rülen) vöär belöäning. Der sint heyl wat mooie sööktochten te vinden van vreanden en reisigers. En sou as altyd sint et de piassen en harries wår y et meyste wille med hebbet.

Uuteandelik köm ik terügge up et algemeyne pad en döäk in de verhaalmissys. Vöär my is de döärslaggeavende test by verhaalmissys in oapenwearldspellen of ik by de cinematiske intro’s mynen klookfoon grype. Dat deade ik seaker med dit spel. Eivor is ‘n best menske en öär verhaal med de ravenstamme sit vul med spannende wendingen, mär wy hebbet dit soort verhalen al verskeidene målen ehöyrd. As y dan toch gåt vöär ‘n spel med noordske mytology, neamt dan de nyste God of War.

Mär låtet wy et neet hebben oaver de dinge dee as y kyket, et geyt der jümmers ümme wat y doot in Assassin’s Creed Valhalla. En dat holdt den andacht wal vaste. Up ‘n gegeaven ougenblik müt y nen verråder vinden, düs dwüng ik myselv üm tüsken de kaartmarkeringen döär te loupen en up te letten of ymand sik verdacht gedröäg, mär ik eandigden al sleppend döär Cambridgeshire, wår ik lüde an den tand vöölden en alibi’s nålöyp. Up eyn moment köm myne vrouwe binnen en vröög my wår ik med gangs was. “Ik söke nen gealen boot! Helpet my es med söken!” Dår had se denk ik meyr wille an as my te seen doomskrollen up de banke.

Assassin’s Creed Valhalla hevt eaven tyd nöydig üm up gang te kummen. Mär låt de sombere oapener u nit untmodigen, want de klouke, verneamstige en grappige oapenwearldgame dee as y söket ligt argens oaver dee düüstere höävels en dalen. Mär mag de volgende assassinvakanty weader argens in de sünne weasen, Ubisoft?

• Assassin’s Creed Valhalla is vanaf den 10. november te krygen vöär PS4, Xbox One, Xbox Series S/X en PC, en vöär PS5 up den 19. november; € 59,99