Kummet wy eandelik in et hologrammentydperk?

Souwat 50 jår leaden wün den hongaarsk-britske natuurkündigen Dennis Gabor de Nobelprys vöär syne uutvinding van et hologram. Mär undanks de sciencefiction-belovtes is et in 2020 up et gebeed van hologrammen noch årdig hol.

Technology üm hologrammen te maken en projekteren is noch nit sou wyd as Star Trek, wårin as heyle kamers hologrammeerd wordet, mär et is der al nen set klår vöär. Souwat teen jår leaden löäten undersökers van MIT al seen at holografiske televisy warkelikheid kunde weasen med gewoane alledaagse elektronika. Med de Xbox Kinect-kamera van Microsoft to makeden see ne holografiske video-oaverdracht van 15 bealden de sekunde.

Med diffrakty kan van ’n oorsprunglik objekt een 3D-afbealding maked worden med deepde, parallax en noch andere kenmarken. Üm nen hologram te maken, mut y weaten wo as lecht, meystal laserstrålen, rund en hologram kaatset en de upname samenvogen med de originäle strålen. Et resultaat is en virtueel beald wat y vanuut meyrdere höke bekyken köänet.

Holografiske skarmen sint al vake in reklames en uutwesseling oaver ver bruked. En bekend vöärbeald was Prince Charles den as med nen hologram ne tospråke höld up de Wearldtop vöär Tokumstige Energy in Abu Dhabi.

De lätste teen jår sint hologrammen ouk bruked vöär virtuele lessen, mär de bekendste vöärbealden kummet uut de musik. En uptreadens van hologrammen van Michael Jackson en Tupac Shakur nå at se al jåren uut de tyd warren deade noch wal wat stuv upwaien. En as wy et hebbet oaver douden töt leaven wekken, TV-persöönlikheid Kim Kardashian kreag vaneyr vöär öären 40. verjöärdag en hologram van öären oaverleadenen vader.   

Vöäle lüden makeden bak van dat geschenk, mär döär öären flinken invlood up sociale media kan et wal es hard gån med de hologrammen. Et patent up de technology achter et Tupac-hologram wör kocht döär underneamer David Nussbaum, den as der et bedryv PORTL med uprichten. Med deselvde technology wör Julian Assange, den uprichter van Wikileaks buten de ekwadoriaanske ambassade projekteerd wåras hee al jåren sat.

PORTL neamt en holografisk skarm sou grout as nen telefooncel. Dårmed kan en holografisk beald maked worden med hülpe van nen normalen kamera en nen witten achtergrund. Et skarm kostet meyr as € 50.000, düs et groute publik mut noch eaven wachten.

Untwikkelders hebbet vaneyr ouk gangs eweasd med en ny, dün soort skarm vöär hologrammen. Med 10 cm dikte sint groute logge beskarmdöäsen nit meyr nöydig. Dårmed is et noch altyd nit draegbår, mär et is weader nen trad vöäruut.

Nu as wy med nen pandemy sittet, mut wy vergåringen en kunferentys virtueel holden. Hologrammen köänet dårby den volgenden grouten trad weasen üm de uuttuusk noch interaktiver te maken.