7 upmarkelike initiativen in 2020: neadersassisk is springleavend

7 upmarkelike initiativen in 2020: neadersassisk is springleavend

Al jåren lamenteert de lüde dat et sou slecht geyt med et neadersassisk. Toch likt dat ne stemme uut et verleaden: twentsk en ouk andere soorten neadersassisk möyget sik verhöygen up voordan meyr belangstelling. In 2020 wörden der heyl wat nye saken up pöyte sat. Een oaversicht.

  1. Nysassiske Skryvwyse

In bruuk was he al länger, mär in 2020 was eandelik de websteade van de nysassiske skryvwyse veardig, sou dat ydereyne der selv med an de slag kan. Med disse skryvwyse kummet alle neadersassiske dialekten optisk nöäder by eynander. En ydereyne mag  et uutspreaken sou as em dat good dücht!

2. Söäven podcasts

‘Twentsk müt y neet skryven mär küren,’ höyr y vake. Seaker as kummentaar up de nysassiske skryvwyse. Lös van of y et dårmed eyns sint, was dat eyne van de gedachten achter de Wearldspråke Podcast, al bestünd den al länger. WAL ny was begin määrt de WATATA-podcast. Weakelikse sorgelouse nöälerye van twey kearls uut Ryssen.

Ouk an de andere kante van den pål sint der verskeidene podcasts stichted. Vöär en oaversicht van alle neadersassiske podcasts müt y es up de neadersassiske Wikipedia kyken.

3. De Beentjes van Sint-Hildegard

Herman Finkers düt et weader. Meyr as 700.000 neaderlanders saggen dit jår Finkers en Johanna Ter Steege skitteren (en twentsk küren!) in syne bewarking van et oorsprungelik tsjechiske filmskript. As klapper an et ende van et jår kreag De Beentjes nen prys vöär besten film van Neaderland ouk noch.

4. Twents voor Dummies

As nyen, yverigen leyrder van et twentsk heb y en probleem. Der is nauliks an good beginnersmateriaal te kummen. Dår löyp Ellen Peters uut Oldensale ouk teagenan. Dårüm beslöät see selv wat te skryven, med hülpe van Harrie Scholtmeijer van de Oaverysselakademy. Et böken is te krygen By et Twentehoes.

5. Neadersassisk in de oaverysselske Provinciale Ståten

Ståtenlid Dinant Leferink uut Goor makeden der sik hellig oaver: as tweyspråkige provincy deade Oaveryssel heylemål niks med et sassisk. Dår must wat an veranderen. Hee deenden ne moty in. Anenöämen, de ståten gåt plat.

6. Twents Kwartearke up de radio

Bie mediastation 1Twente kunde nüms twentsk. Apart. En dat in de höyvdstad van Twente! Dår must wat an veranderen. Med lecht vermaak kum y mangs wyder as med swåre verhalen. Of sou as ds. Anne van der Meiden seade: med ne skuuvkåre kryg y an de vöärdöäre wat ne vrachtwage mär töt up den dyk krigt. Düs doot se alle dunderdage et Twents Kwartearke, med Adrie Hemmink van et Twentehoes.

7. Twentske oldejårspreyke

Deeselvde kearls van de WATATA-podcast nöälden meyr as en uur vul in öäre twentske oldejårskunference. Wal vöäle oaver öär eygene Ryssen, mär toch wüsten se binnen een paar dage sou’n 1000 views te trekken.

***

Med andere wöörde: wy sint noch lange neet uuteküürd. Ouk in 2021 steyt der weader heyl wat up de rulle. Mär dåroaver later meyr!

admin

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.