Hollandsk up nye websteade Nedersaksisch.com ougstet vöäral unbegrip
De nye websteade wat et belang van et neadersassisk as bindmiddel tüsken streaken in Oustneaderland en Noorddüütskland benådrükket, is vulleydig in et hollandsk upsteld.
Et was der houge nöydig, de voreyniging van de neadersassen. Dårümme was de websteade Nedersaksisch.com ne welkumme anvülling up et groiende palette an steades wåras andacht vöär et neadersassisk is.
Andacht vrågen is elükked, mär wellicht neet up de wyse wat de uprichters edacht hadden. Up de websteade selv is ja souwat gin neadersassisk to leasen, wat en paar platspreakers in et vorkeyrde kealengat sköäten is.
“Geavelkes-neadersassisk”
Lös van en paar dekorative neadersassiske spröäken tüskendöär, is de websteade ironisk genog vulleydig in et hollandsk. Der steyt selvs to leasen:
“Het Nedersaksisch […] met trots uit te dragen…”
Dat völ ouk de nysmakers van de freeske websteade Itnijs.frl up. See saggen in Freesland vake etselvde, med wat see geveltsjesfrysk nöömden. Dårin makeden lüde sik der makkelik vanaf med wat lösse freeske kreten, as ne ård symboolpolitik, sunder der echt wark van te hoven maken:
“De pear losse Nedersaksyske wurdsjes en spreuken op Nedersaksisch.com lykje in foarbyld te wêzen fan ‘geveltsjenedersaksysk’.“
Martin ter Denge, uprichter van Wearldspråke, hoapeden eyrst noch up ne eynaprilgrappe, mär dee unthülling bleav uut. Hee gavven an dat hee hoapet dat der in yder geval noch argens ne köäse kümt uut verskillende språken.
“In et logo van de websteade steyt selvs ‘Nedersaksisch leeft’. In et neaderlandsk! Y künnet u afvrågen wat vöär signaal dat afgeavt. Wo seriöös y et dan selv neamet.”
Plat is warktüüg, gin museumstükke
Ouk van de düütske syde was der weinig begrip vöär de köäse. Arne Waldemar Lentföhr, moderator van de Facebook-grup Plattdeutsch – de sassisk språke, skreav:
“Al de energy un dat wark un de euros uut de knip bringt joa niks wän de språk ni bruukd wardt. De webstea sügt bannig good uut. Weer even moi wän Plat dat warktüüg weer un nich de knoaken in’t museum.”
Inferiöör
In de Facebook-grup nedersaksisch/plattdüütsch skreav Sander Hunink: “Lüde van Neaderlandske streektålorganisaties hebbet ne nye websteade online eset. […] In et hollandsk! […] dårmed hebbet se düdelik emaked dat neadersassisk blykbår noch altyd inferiöör is.”
Ouk skryver Chris Canter klüm in de penne vöär ne oaverdenking:
“…’Nedersaksisch is springlevend’, löd de striedkreet van de Nederlaandstalige toelichting. De mythologische springlevende gebruker van ’t Nedersaksisch – al zie ik volk van baoven de zestig now juust niet zo hoog meer springen – is der allent toevallig net vandage even niet bij. De motten mut te vreten en ’t heui mut van ’t laand… Een zoveulste vörm van starvensbegeleiding veur de taal, mar ok as symbool veur zaken die niet direct wat mit de taal van doen hebt.”
Wat vöär Plat dan?
Renate Snoeiing, direktrice van et Huus van de Taol, bracht in en tweet teagen alle kritik in: “Evenpies lös van de schriefwieze, veur welke Nedersaksische variant moew dan kiezen op de webstee?”
Dat was een valide punt. Neadersassisk hevt ja noch altyd ginne standaardspråke, wårdöär by oaverkupelende saken altyd disse vråge üm den hook kümt. Ter Denge meynden dat dat “neet uutmakeden en dat denne wat skrivt, bepålt.” As y et as eyne språke presenteret, müt y et ouk as eyne språke behandelen.
Ouk wör der vöäle weasen up de nysassiske skryvwyse as nye möägelike middenweg tüsken alle dialekte. Disse skryvwyse was jüüst untwikkeld med dit soort saken in et achterhöyvd. Dår solde et slim good te passe kummen.
Beginpunt
Snoeiing, dee as betrökken was by de untwikkeling van de websteade, gavven an dat et noch mär et begin was en dat der noch vöäle meyr up de nye websteade geyt kummen:
Dår blyvet de neadersassen dan noch mär up hoapen. Oaver de förmgeaving was ydereyne wal good to spreaken.
Nedersaksisch.com is ne samenwarkingswebsteade van verskillende provincies en neadersassiske språkinstituten. De websteade wil et middenpunt weasen wår as vöärbealden tohoupe kummet van woas et neadersassisk leavt in de oustneaderlandske kultuur, ekonomy en samenleaving.
