Bröydje Wearld: twey sneyde stute med 12.724 km dikke beleg
Nen student an de Universiteit van Auckland in Nysealand hevt een Bröydje Wearld emaked, döär tegelyke med nen vrywilliger uut Spanje ne sneyde stute up de grund te leggen up precys de andere syde van de wearld. Dat steyt up de websteade van Radio New Zealand.
“Makkelik was dat noch nit, segt Etienne Naude (19) uut Nysealand teagen RNZ. “Y müt reakening holden met et tydverskil van 12 uur, de ård stute en de steade; Een grout deyl van Nysealand besteyt uut water. Dat maket et lastig.”
Ouk et vinden van nen vrywilliger in Spanje was noch nit simpel. Den nysealandsken student Komputerweatenskappen probeerden et eyrst langs kündigheid van vreanden en family, mär dat löyp up niks uut. Via Reddit küm hee uuteandelik in kontakt med nen wildvrömden, wårvan de name noch nit bekend is.
Med hülpe van Google Maps wör de precyse steade bepåld. Den nysealander hoovden mär een paar hunderd meter up den trad, den spanjaard müst 11 kilometer reisen. Et resultaat was een Bröydje Wearld: twey sneyde stute med 12.724 km dikke aerdbeleg der tüsken.
Naude hevt nu up Reddit.com ne subreddit lösdån wår as y uwe teagenpole upsöken köänet üm selv een Bröydje Wearld med te maken. Een teagenpole vinden is bysünder: mär 15% van et landuppervlak ligt teagenoaver mekander. As y vanuut Twente dwars döär de aerde kunden, sul y an de andere syde in den oceaan uutkummen. Gin enkele steade van et neadersassiske gebeed hevt ne teagenpole up land.
