Verdachten kan enkel grönningsk – rechters proberet et ouk
GRÖNNINGEN – Uutdaging vöär de grönningske rechtbanke verleaden dunderdagmorgen. Vöärkoamen must nen kearl den as enkel grönningsk kan. Dat stünd te leasen up Dagblad van het Noorden.
Den verdachten is nen 51-jöärigen kearl uut Veandam. Under mear skryvet se em to dat hee uut wråke ne blaue wage in Westerlee in den brand estöäken hevt. Hee meynden at dat den auto van synen ex was. De wage bleak van nen nåber te weasen en was tovallig ouk blau.
Den kearl sul eyrder brand estichted hebben in Müntendam, wår as synen ex domåls woanden. See was når öäre olden in Westerlee weaderümme gån üm de problemen uut de weg te gån. Nöäst brandstichting wördt hee ouk verdacht van et vernelen van auto’s.
Freesk mag wal
Den officier van justity wul at he drey jår de gevangenis ingüng, med een jår vöärwaerdelik. Ouk must den verdachten een steadeverbod krygen vöär Müntendam, Westerlee en ümgeaving.
Volgens de wet müt rechtsaken in et neaderlandsk verloupen. In Noord-Neaderland mag freesk ouk, ouk in rechtbanken van Assen en Grönningen. Et grönningsk mag nit.
De rechters haspelden grönningsk en neaderlandsk döär mekander. Den officier van justity – den as gin grönningsk kan – kreag bystand van nen grönninger medwarker van et Oupenbår Ministery.
Uutspråke volget oaver twey weaken.
