Korona: hengeler old-stadsdichter Fred van de Ven (70) uut de tyd

HENGEL – Verleaden dinkseldag köm Fred van de Ven (70) uut de tyd in et sekenhuus van Almelo. Van de Ven was al länger slim seke, mär döär et koronavirus güng syne gesundheid noch wyder achteruut. Hee is dårmed et veerde slachtoffer van Korona in Twente. Dat steyt woonsdag te leasen up de websteade van Tubantia.

Ümslagfoto: Irma Bruggeman

Van 2008 töt 2010 was Van de Ven stadsdichter van Hengel. Hee skreav al med al so een hunderd gedichten, med name oaver Hengel en de ümliggende streake. Mangs in et neaderlandsk, ouk in et twentsk.

Van de Ven was nöäst dichter ouk lecht- en gelüüdsman in et enskedese Concordia-teater. Ümdat hee leevde vöär et teater had, skreav hee syn wark sodöänig dat et ouk te singen was.

Sansan
Med Yvonne Eikenaar, syne vrouwe, en een paar lüde meyr vörmden hee et sangkoppel Sansan. Dårmed deaden se öäre gedichten en verskes vöärdraegen. Mangs med gitaar, mangs a-kapella. “Töt et lätste to is hee blyven singen,” segt syne weadevrouwe Yvonne Eikenaar.

Triooo
Med een paar kameröäde vörmden Van de Ven ouk de band Triooo. Dårmed deade hee twentske verskes maken of bestånde leedkes ümsetten in et twentsk. Syn bekendste wark is wellicht ‘Bennie’, wat med stemde beerfleskes begeleided wör.

Van de Ven med Triooo. (YouTube/Goaitsen van der Vliet)

Wilmink
Do as Willem Wilmink noch leavden was Van de Ven der med bevreanded. Vöär syn 50. verjöärdag dröög Wilmink een neaderlandsk gedicht an em up: “Cowboy Fred”, dat bul steyt med twentismen.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.