Red Dead Redemption 2 review – betöverende western is sowat een wunder *****

 

PlayStation 4, Xbox One; Rockstar Games (5/5)

 

Vulledige underdompeling in een verbasingwekkend realistiske wearld. Of y nu skeetgevechten med rivalen hebbet of deers villet, dit bandytenavontüür van Rockstar Games is een ny gamehöögtepunt.

Ydereyne den by Red Dead Redemption 2 meynet dat et Grand Theft Auto med paerde is, sal verbased wean oaver dit behöörlik langsame, ryke historiske Wilde Westen-drama dat vöäral up karakteruutbow basered is. Ungeveyr 60% van uwe tyd spandeyr y med rundryden döär de amerikaanske wööste. Der is ook akty: skeetpartyen, treinoavervallen en med regelmåt spannende untsnappingen te paerd. Mär disse spannende upwellingen sint enkel underbreakingen in een spel wat vöärnamelik geet oaver ‘argens wean’; jagen, visken en lange gespreaken up paerdrytochten döär et land of rund een kampvüer. In ne vrömde toogeavlike büye hevt Rockstar Games (de makers van Grand Theft Auto en ene van de meyst succesvulle gameuntwikkelaars van de wearld) skynbår söven jår en hunderden miljonen dollars upoffered üm de spelversy van de TV-ryge Deadwood te maken.

Dit is een verhaal (eygenlik ne grote versameling verhalen) oaver et verval van ne leavenswyse, terwyl ne kleine bende rövers proberet de ununtkoambåre vöärtgang van de amerikaanske moderne tyd vöär te blyven, nöäst öäre vyanden en deenders van de wet dee as se teagen sik ekreagen hebbet. Et karakter dår as y med spöllet, Arthur Morgan, is der ene uut ne kleine, vaste gruup karakters rund bendeleider Dutch van der Linde. Dat is nen klassyken bandyt den as sikselv meyr nen vryheidsstryder achtet as nen bandelosen krimineel. Et spel büdt botsingen med uplichters, rivaliserende südelike landgoderen, andere bendes en een leyvendig anbod van karakters dee et Amerika van rund de eeuwwesseling teakenet. Et kikt når ras en et lyden van vrowlüde, mär höldet et oaverkupelende verhaal rund de bende van Van der Linde.

Bandyten up de vlücht vöär de moderne tyd … Red Dead Redemption 2. Foto: Rockstar Games

De karakters wordet gelöövwaerdig döär de technology wårmed se der uutseet en beweyget as echte mensken, de aktöörs dee unwys good en med unverwachten deepgang spöllet, en verhaallynen dee öäre swaktes en beslommeringen medneamet. Terwyl y med öär medrydet up öäre roovtochten, swendelarye en andere teagenspoden, deelt se urenlange anekdotes en persöönlike insichten, wårmed ryke portretten nearsat wordet. Et leyven draeyt üm et kamp wår y as spöller steeds wearkommet tüsken oavervallen, jachttrips en anvåringen med de wet, üm te etten, slåpen, by te koamen en te köyeren med andere bendeleyden.

As et nit so mundlösvallend mooy was emaked allemål, sul de tyd dat y in Red Dead Redemption 2 van de umgeaving müt geneten gewoon unverdraegelik saai wean. Mär et Olde Westen wat Rockstar hyr in mekander draeyet is sowat mirakulöös. Red Deads wearld is een lappendeaken van amerikaanske landskappen in nen nöätendop: et friske kolde uut de bargen, de vlaktes met afplatte tåfelbargen med uutsichten töt an de horison, mistige, dokige mörgens in de bayou van ‘n versünnenen südeliken ståt Lemoyne. In dörpe, of in de graue, betöverende stad Saint Denis, ne rap moderniserende kopy van et Ny Orleans van rund de eeuwwesseling wår as u ‘n mund van lös sakket – y köänet alle figuren up stråte groten en nen achterdochtigen mär beleavden nikkop wearümme krygen. De paerde sint sowat angstwekkend echt, ståtige deers dee grummet en sweatet as y gallopeyret en dee nervöös hinniket as y ‘s nachtes wulven höret.

Et beseatene wårmed as se details anbrachted hebbet (en de gedreavenheid üm der de spöllers in under te dompelen) düt denken an Cormac McCarthy’s bööke. Dee lange, nauweliks interpunkteerde stükken wår hee hele bladsyden vülleden med beskryvingen van landskappen en wår y an et ende untdekkeden dat y al minutenlange ‘n ådem inholdet. Rockstar püttet uut allerhande filmachtige en literaere wellen vöär disse versy van et Wilde Westen. Mär de afbeelding der van is originääl en minder verromantisered en moralistisk as de westerns wår as se de oavervallen en skeetpartyen te paerd van hebbet. In films köänet se nit teentallen uren an scene-upbow doon so as dat in Red Dead Redemption 2 wal kan, döär u up lange reisen te paerd te stüren, vake noch sunder geselskap ouk noch. Y müt deers villen, geweren skonemaken, uselv wasken. Wår disse måte van detail too lidt is niks anders as totale underdompeling, et gevööl dat y et echt beleyvet.

De sensaty van ne beleyvenis … Red Dead Redemption 2. Foto: Rockstar Games.

Disse wearld is nit bloots ungenadig mooy, der geböäret ouk so vöäle dat y uselv vake up unverwachtse avonturen bevindet. Dit is nit et standaard videogamewark wår y niks doot as versamelen en vermoarden. Tydens ne jacht up nen prysbuk köm ik toovallig by ne treinberöving, beslööt tüskenbeide te koamen, en mus vervolgens de trein når et volgende station vöären, wår ik ne saloon ingüng en an et hauen köm by een pot poker. Doo as de wetsdeenders my grypen wullen, achtervolgeden se my kilometers wyd, töt in een deel van de wearld dat ik noch nooyt eseen had en wår ik myn kamp makeden an et spoar en myselv wat swynevleisk kokkeden. ‘s Anderendagens köm ik by tooval een klein köppelken kriminelen rund een kampvüer teagen, dee vöär den ingang van een groot grottenstelsel bleyken te sitten. Dat was wear ne versteaksteade vöär ne hele bandytenbende. Ik oaverleyveden de skeetpartye naueliks en mus maken dat ik vurtköm vöärdat ik se bestealen kun, want premyjagers uut et vöärige dorp hadden my evünden. Dit was al med al miskyn twey uur spöltyd en Red Dead hevt der noch 100 of meyr. Et is unmöägelik groot.

Gin twyfel möägelik. Dit is een revolutionäär spel. Et set ne nye standaard vöär leyvensechte spelwearlden, jå, mär dee wearld büdt tegelyke underdak an ne verhaallyne van et Wilde Westen dee unverwachts somber is en nit bange is üm flink de tyd te nemmen. Med mär heel weinig uutsünderingen landet de verhalen van Rockstars skryvers oaver disse gruup bandyten perfekt. De pleserige draeingen en wendingen van individuele missys en höövdstükke draeget by an een upwindend, good uutdacht en upslukend groter verhaal – en de verhalen dee y hyr selv untdekket sint ook oavertügend. Ungevear 2000 lüde hebbet hyr knetterhard an warked (in wat gevallen selvs wat te hard) üm dit spel möägelik te maken. Ydereyne afsünderlik mag grööts wean up öäre bydrage.

Red Dead Redemption 2 kümt vrydag 26 oktober uut.


Döär Keza MacDonald
25 Oktober 2018

Welle:
The Guardian. MacDonald, K. “Red Dead Redemption 2 review – gripping western is a near miracle”. 25 Oktober 2018.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.