Insta van Paus ‘liket’ brasiliaansk model, Vatikaan hellig

Insta van Paus ‘liket’ brasiliaansk model, Vatikaan hellig

Et Vatikaan wil ne verklåring van Instagram wo as et kan dat et officiele Instagramakkount van Paus Franciskus nen foto med weinig üm et lyf ‘likeden’ van Natalia Garibotto, en brasiliaansk model. Dat stünd te leasen by de britske krante The Guardian.

Et is neet düdelik wanneyr et geböärd was, mär up den 13. november was et noch te seen, wårnå et den volgenden dag untliked wör, seade et Katolike Nysagentskap CNA.

Et managementbedryv van Garibotto, COY co., haalden der natuurlik de meyste publiciteit uut en deylden der verleyden vrydag ne skarmupname van up öär eygene Instagram-profil, med as byskrivt dat se “ne officiele seagen van de Paus hadden”.

Garibotto, dee as 2,4 miljoon Instagram-volgers hevt, grappeden der oaver: “Ik komme in elk geval in den heamel.”

Uut brunnen kortby et perskantoor van et Vatikaan had CNA vernömmen at der en undersöök küm når wo as et kan dat de foto liked wör.

En heyl koppel lüde beheyret de verskillende sociale mediakanalen van de Paus. Nen woordvoorder van et Vatikaan seade teagen de Guardian: “Wy künnet uutsluten at de like vanof den Heiligen Stool küm en wy hadden gaerne ne verklåring van Instagram.”

Paus Franciskus is slim populäär up sociale media. Syn officiele Instagramprofil franciscus hevt 7,4 miljoon volgers. Et profil volget selv nüms. Up Twitter hevt de paus 18,8 miljoon volgers. In 2017 was hee den meystevolgden wearldleider up et platform.

Toch gebrukt hee et selv nauweliks. “Hee is Donald Trump neet,” segt Robert Mickens, redaktöör by et Katolike Dagblad La Croix. “Hee sit neet den heylen dag achter den komputer of up syn mobileken te twitteren. Hee köärt wal tweets vöärdat se posted wordet – likes neet – en heyl af en to hevt he wal es selv wat vöäresteld üm te plaatsen, by vöärbeald by en noudgeval. Hee hevt hyr düs selv niks med te maken. En wo as dat dan sou kan geböären… tja.”

admin

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.