Wild swyn stealt voldreakener van düütsken nudist
Nen nakeden sünnebader in Berlyn kreag applaus van toskouwers vöär syne jagd up en wild swyn wat synen laptop stöälen had.
De fotografe wat et drama vastelegden seade at de anonyme nudist et heylemål prima vünd üm de bealden te deylen. Up de foto’s geyt hee in et bloute gat achter et wilde swyn en twey biggen an, terwyl as andere badgäste lachend tokyket.
“De natuur slüt terügge,” skreav Adele Landauer, ne personal coach, up Facebook. “Ik löäte den man de foto’s seen en hee lacheden smakelik. Ik kreag tostemming üm se oupenbår te maken.”
Den man leade te sünnebaden by de Düvelssey in Westberlyn, ne populäre en vulleydig legale beasigheid in den Düütsken höyvdstad. De beasigheid valt under wat lokaal bekend steyt as FKK, of Freikörperkultur (vrylyfskultuur).
Et wilde swyn, wårvan as der steyds meyr eseen wordet, had andere badgäste ne pizza seen eaten. Et güng an de haal med ne geale taske med dårin den kearl synen voldreakener. Wårskynlik ümdat he meynden at der eaten in solde sitten. Den kearl güng der up nen draf achteran, de buskes in.
“In de taske had hee synen laptop. Dårümme gavven he syn allens, selvs in syn adamskostüüm,” seade Landauer.
Et wilde swyn kunde nit sou hard döärdat he underweags ne kartunnene döse teagenköm. Den kearl klappeden in de handen en höw med nen stok up de grund. Uuteyndelik löät et swyn de taske lös.
“Do as he et busk weader uutköm, kreag he grout applaus,” seade ne andere getüge.
Derek Ehlert, ombudsman vöär wilde deers in Berlyn seade teagen lokale media dat dit soort vöärvallen steyds vaker vöärkömmen. Ouk vosken kommet vöördan vaker kort by lüde.
“Raket astubleevt nit in panik,” seade hee. “Töt düsverre hebbet wy noch gin verwundingen had – de deers sint heylemål an lüde wend.”
