Bookoordeyl: Chris Canters ‘Moenen’ vöärbeyld vöär nye skryvers

Med syn 38 jår is Chris Canter når verholding (helaas) een jung gesichte in de neadersassiske skryverye. Dat wil nit seggen dat syn wark underdüt vöär dat van platskryvers dee med meyr leavensjåren begenadigd sint.

Inteagendeyl.

Wår as den döärsneyde platskryver nit wydter dörvt te kyken as syn eygene dörpke en veilige verhaalkes skrivt oaver nåberskap en et gode leaven up de buurderye, gript Canter up eygen, vulwaskene wyse hüdige tema’s as klimaatverandering by de oren. Dat dat in seakere sinne ouk wal wear dörpske saken sint, maket Canter prikkelend düdelik.

In noch gin hunderd bladsyden neamt hee uns under meyr med an et händke van nen wat sküchteren neagenjöärigen ‘ik’, den as sik et leevste heyle dage in böker versteakt of anders wal yderen kans angript üm argens hen te dröymen. Syne wårneamingen wordt anvüld med ne ryke fantasy, dee in byvöärbeyld Gien Kunnigheid selvs an Belcampo düt denken, al hevt hee dår når eygen seggen noch ginnen letter van eleasen.

In andere verhalen störtet den skryver u in de gevöölswearld van nen noord-europeesken twentiger in Madrid, wår vreandskappen med andere nykoamers afhanget van öär paspoort. In wear andere verhalen beproovt hee uwen literairen kennis of knipouget når Stephen King.



Et geringe paar bladsyden löt meskeen denken dat et een rap vlegewark was. Toch hevt den madrileensk-nylusiger skryver der minstens 13 jår oaver edån, seade hee by syne bookpresentaty in Beilen. Wellicht teakenend vöär syn gevööl vöär uutstel en upbouw. In Weg van alle vleis, oaver nen drentsken veganist den as een bestseller skrivt, höldet hee u töt et lätste oaver den afloup in et unwisse.

De körteverhalenvörm past good. Med Canter syne spitsvundige woordkünsten is yder verhaal lang genog üm u eaven good vöär te setten en kort genog üm in eynen åsem döär te gån når et volgende. Et eanigste minpünt kun weasen dat der nit meyr inståt.

8,5/10
—-
Moenen kön y u anskaffen by drentheboeken.com of döär ne duve te stüren når info@hetdrentseboek.nl. Et böken kostet u € 12,-, versendkösten nit medreakend.

 

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.