YouTuber PewDiePie is ‘slim möde’ en skeidet der med uut
YouTube-bekendheid PewDiePie hevt ankundigd dat hee der nen tyd tüskenuut geyt up et videoplatform. Hee segt dat hee ‘slim möde’ is.
De dartigjöärige sweydske YouTubesteare, den as in et echt Felix Kjellberg heat, kreag vöäle bekendheid med syne filmkes wårin as hee kommentaar leyverden up videospöllekes. Lange tyd was hee de best-verdenende YouTuber van de wearld.
De lätste tyd kreag hee nen kladden an et gat vanweage vermeynd racisme en antisemitisme.
“Begin tokoamend jår sin ik een tydjen weg. Ik legge et later noch wal uut,” seade PewDiePie in nen video.
Eyrder van et jår wör PewDiePie, good vöär 102 miljoon volgers, inhaald döär T-Series, een platenmåtskappye uut et indiaske Bollywood, dat nu 121 miljoon volgers hevt.
“Ankoamend jår skeid ik der eaven med uut med YouTube. Ik segge et nu alvüste, want ik hebbe et al beslöäten. Ik sin möde. Ik knappe sowat af by de enkels. Meskeen kün y et my anseen,” lachden PewDiePie.
In 2017 deade Disney der de samenwarking med em al achterhen, do as uutköäm dat een paar van syne video’s Nazi-verwysingen en antisemitiske bealden hadden. Hee güng der in med dat et materiaal lüde teagen de skeanen kun stoaten, mär seade dat hee “achter gin enkele haatdraegende holdingen stünd.”
PewDiePie was med Disney verbünden langs Maker Studios, een bedryv med een netwark van YouTubers.
Later dat jår veruntskuldigden hee sik vöär et gebruuk van een racistisk woord by ne rechtstreekske uutsending. Verleaden jår must hee weader döär et stuv ümdat he ne meme deyld had wårin as Demi Lovato’s sekenhuusbehandeling vöär vermoodde oaverdosering up de hakke nöämen wör.
