Kern-en-gin-eande: wo as nen 62-jöärigen kearl acht uur plankeden – en wat wy der van leyren köänet
döär Sam Diss
Oorsprunglik bericht: The Guardian
George Hood, nen amerikaansken old-marinyr van 62, verbröäk disse månd et wearldrekord plankliggen med nen tyd van 8 uur, 15 minuten en 15 sekunden. Dat was veerteen minuten länger as et vöärige rekord. Et oorsprunglike rekord skreav he ouk al up naam in 2011, med ne magere 1 uur en 20 minuten. Dat rakeden hee in 2016 kwyt an Mao Weidong, nen politykearl uut China, den as der 8 uur en 1 minute van makeden.
Acht uur is sowyso akelig lange, wat y ouk doot. Heylemål hangend med uw gesichte 20 centimeter boaven et grundholt van ne sportsale. Toch hevt nen goden planklig heyl wat vöärdeylen. “Planken is onmündig good ümdat et allemål üm stabiliteit draiet,” meynt höyvd yogaleider Chris Magee van Psycle London, selv vöärmålig persöönlik träner, rugbyspöäler en vechtsporter. “Dat is de slöätel töt ne aktive, gesunde leavensstyl. Y wilt verneamen dat y ne starke, beskamde rügge hebbet as y loupet, hardloupet of selvs as y gewoon sittet.”
Med ne gode kern, solde y denken, kümt ouk een uutbeiteld waskebröd. So eyne wat Brad Pitt in Fight Club had. Eyne dee as wy allemål hebben wilt. Mär dat is mär uppervlaktewark. Et echte wark kümt uut de depere spyren, dee as y nit seet.
Üm syn wearldrekord terügge te pakken, deade Hood de lätste anderhalv jår alle dage trainen. “Ik do alle dage 700 mål updrükken, 20x 100 buukspyroveningen en 500 mål döär de huken (squats),” seade hee teagen CNN. “Vöär et boavenlyf en de årmen doo ik ungeveyr 300 mål bicepkrüllen.” Üm de seyrte te verbyten deade hee hardte rockmusik lüsteren. Leevst Rammstein. Kaput vel up de elleboagen was te verdraegen as de årmen eynmål verdöyvd rakeden.
As y ervaren plankligger sint, müt y selv weaten of y der net so hard ingåt as Hood. Mär volgens Magee köänet selvs beginners rap beater worden as se de technik te pakken hebbet.
verhaal geyt wydter under afbealding
“Med nen plank,” segt Magee, “spreak y et bekken en de skolders an, de rügge en de groute spyren in de beyne. Et kostet kracht üm se stille te holden. Et is ne upstapelende ovening en spreaket uw heyle lyf an. Selvs as y der alle dage eyne van 30 sekonden doot, verneam y al gau verbeatering.”
As y der elken dag 10 sekunden by up doot, bouw y et stöädigan uut. Dat klinkt simpel. Mär ouk by ne når verholding simpele ovening – legt u vöär de grund en beweagt nit – kan der noch sat mis gån. Een grout deyl van de readen at wy et verknoiet sit em in dee simpelheid.
“Vöäle lüde kyket der oaverhen,” meynet Magee. “Mär as y echt de pünten vöär nen goden plank afwarket, kostet et u knypen en begin y flink te beaven.”
Y hoovt der gin acht uur oaver te doon, mär as y uwen plank med gemak vulbrengt, is der wat nit in örder. De plank müt u grypen. Y müt em völen töt (sorry) in et deepste van uwen kern.
