Weatenskappers vindet wyse üm mikroplastik te vangen med bakterien
Mikrobiologen hebbet ne duursame wyse untdekked üm vervulend mikropastik te vangen: med bakterien.
Bakterien pikket van nature by mekander an uppervlakdes, wårmed ne plakkerige låge untsteyt dee as ‘biovel’ enöömd wördt. Wy seet et alle morgens as wy de tandene puutset üm van unsen tandplak af te kummen, by vöärbeald. Undersökers van de Polytechnische Universiteit van Hongkong (PolyU) willet med dat kenmark an et wark en plakbandachtige netten van mikroben maken dee as mikroplastik uut et water halet. Dat pikket dan te houpe in nen makkelik recyclebåren kluten.
De uutkumsten wörden verleyden woonsdag by de jårlikse kunferenty van de Societeit van de Mikrobiology oupenbård, al sint se noch vöärloupig. Toch kan disse uutvinding up langen duur leiden når duursamere uplössingen vöär versmearing med plastik, döär gewoan en natuurlik proces te gebruken.
“Et is van leavensbelang dat wy warkende uplössingen bedenket dee as mikroplastik antrekket, by mekander gaddert en recyclet,” meynden Sylvia Lang Liu, de undersöökster by de PolyU wat dit undersöök leidet.
Med mikroplastik wördt bedoold de stükskes plastik kleiner as 5 mm. Dee kummet in de natuur döär et maken en afbreaken van under meyr boadskappentasken en waterflesken – of by alledaagse handelingen as et wasken van syntetiske kleyder sou as nylon, of persöönlike hygieneprodukten med skrubbende mikrokrallen der in.
Ouk al sint dee mär klein, toch sint se en grout gevår vöär et miljöö. Mikroplastik kan neet makkelik döär de natuur afebröäken worden. Dårdöär blyvet se länger rundhangen. Undertüsken suget se giftige stoffen up. Se verspreidet sik in afvalwater en in unse oceanen en wordet upevreaten döär oceaandeers en -visken, dee as dårdöär gevår loupet. De visken wordet döär mensken evöngen, dee as se dårdöär ouk weader binnenkryget.
In 2018 vünd de Internationale Maritime Organisaty by ne telling by meyr as 114 verskillende waterdeers mikroplastik deylkes. Ouk sint se vünden in solt, slåd, appels en andere gröönden.
Toch is der neet eyne vaste uplössing vöär alle soorten mikroplastik.
By dit undersöök hebbet Liu en öär team en bakterieel vlees eförmed van nen baktery med name Pseudomonas aeruginosa. Dissen baktery kan runddryvende deylkes mikroplastik vastesetten. De mikrobe-netten vanget et mikroplastik up en låtet et sinken. De undersökers künnet de vergadderde klutens upvangen en en löslåtmechanisme in warking stellen. Dårmed kümt et mikroplastik kontroleerd in upvangbäkke terechte, klår üm recycled te worden.
“Et is ne starke vernyende en spannende wyse üm med uutedokterde biovelle et plastikprobleem an te vatten,” weat Dr. Joanna Sadler, ne undersöökster an de Universiteit van Edinburgh. “Eyne van de gröätste uutdagingen by mikroplastik is sükke kleine deylkes uut de natuur seen te krygen. Liu en öär team hebbet ne elegante uplössing evünden. Et hevt grouten kans üm in et echt in afvalwatersüvering te worden gebruked.”
Toch is den proov noch vöärloupig, en in en laboratorium probeerd. Wo as et up sey of in et riool warket is noch neet düdelik. Dårby veroorsaket de gebrukede baktery, de aeruginosa, seekdes by mensken en kan dårdöär wårskynlik neet gebruked worden in drinkwater. Wal meynet de undersökers dat nu undersöcht worden kan of dit ouk warket med andere bakterien.
“As wy et hebbet oaver et upvangen van mikroplastik is dit ne slim interessante untwikkeling,” vünd Dr. Nicholas Tucker, emeritusprofessor in molekuläre mikrobiology by de Univeristeit van Strathclyde. “Of dat upskaled worden kan, gåt wy noch seen.” Volgens Tucker müt ouk noch bekeaken worden up wat vöär uppervlakdes et biovel wil groien.
Al med al löt dit soort undersöök seen wat med mikrobiale biotechnology bereiked kan worden. “Döär mekander is beweysen dat mikroben in den heylen leavensloup van plastik ne rulle kan en sal spöllen,” meynden Tucker.
Indiaske papaverburen hebbet hülpe vråged by de regeyring ümdat öäre velden steyds plündered wordet döär opiumverslaavde parkyten.
