Grönningske summerhit ‘Mooie dag’ nummer 1 in belgiske hitlyste
GRÖNNINGEN – Et nummer ‘Mooie Dag’ van den grönningsken band Steernvanger steyt up de eyrste steade in ne lyste van 100 meystedraide nummers van de belgiske radiosender Jouwradio. Dat skrivt Dagblad van het Noorden.
“Et is belachelik. Raar. Heyl apart. wy sprekket gin woord Belgisk. Skynbår vindet se et grönningsk wal mooi,” meynet sanger en gitaarspöller Dion Bouwes.
Steernvanger deylt de eyrste steade med Wim Helsen (‘Draken’) en Wim Leys (‘Als ik jou zie’). De leedkes van de dree artisten wörden de lätste dartig dage allemål 56 mål belüsterd. Pas up nummer 9 kümt de tweyde neaderlandske artist vöärby: Kraantje Pappie en Paul Sinha med ‘Hoe het loopt’.
Bouwes gevt to dat den band selv ouk wal up et eygene nummer estemd hevt, mär dat was nit an de cyfers te seen. “Wy weatet neet wo vake as der in döärsneyde stemd wördt.”
Eyrder haalden de band ouk al de top 3 up et belgiske radiostation. Tohöyrders köänet dår öär eygene nummers andraegen.
Ouk up 1 by RTV Noord
Bouwes hevt wyders niks med Jouwradio. “Ik lüstere der selv neet når. Se draiet allerhande musik. As et mär neaderlandsk is of nau verwant med neaderlandsk.”
Steernvanger steyt ouk al drey weaken up de darde steade in de Noord 9 van RTV Noord.
De band hoovt der de eyrste tyd noch niks med te verdenen. “Wy verkoupet noch niks, allens steyt vry togangelik up Spotify. Uptreaden vindet wy et mööiste.”
Video 60.000 mål afdraid
De video van Mooie Dag is up Facebook al 60.000 mål bekekken. “Dat is best wat vöär uns.” Ouk weatet de lüde de weg når de websteade al better te vinden.
Den band düt et desundanks toch noch händig an, ümdat der weinig geld binnenkümt en ne upnamestudio afhüren årdig in de papyren kan loupen.
Med veerteen dage geyt dee band weader gangs, med twey nye nummers. “Wy wilt et good upnemmen en afmengen. Dat müt allemål wal betaald worden en souvöäle hebbet wy noch nit.”
Underwyl hevt Steernvanger wal mooi twey hitnoteringen te pakken, in et eygene Grönningen en yts wyderup in Belgie. Bouwes blivt sik der oaver verbasen: “Heyl bysünder, heyl apart.”
