Noorske Eerste Minister spölt Pokémon GO in et parlemeant

Der warren al wal mear regearingsleu in de Kamer trappeerd met et spölleke, mer dit moal was et de Eerste Minister zelf.

Erna Solberg, Eerste Minister van Noorweagen, wör oonder een debat trappeerd met Pokémon GO. (foto: Justin Lane/EPA)
Erna Solberg, Eerste Minister van Noorweagen, wör oonder een debat trappeerd met Pokémon GO. (foto: Justin Lane/EPA)

Erna Solberg, de Noorske Eerste Minister, wör trappeerd met et spelleke Pokémon GO tiedens een debat in et Storting, et Noorske parlemeant. Det zee gek is op et spölleke is gin niejs. Tiedens ne offisjele reaize noar Slowakieje gung zee der ook al tuskenoet um et spölleke te spöllen. Ze zea tegen verslaggewers at ze gearne een antal van öare 10km-eier wol loaten oetkommen.

Erna Solberg, eerste minister van Noorweagen, spölt Pokémon Go in et Parlemeant. (foto: Tom Henning Bratlie/Klassekampen)

Et is zelfs neet et eerste moal at Noorske politieker met et spölleke snapt wordt in et parlemeant.

De leadster van de Liberale Partieje, Trine Skei Grande, spöllen et tiedens ne gaddering oawer nasjonale zekerhead verleden Augustus, toen as de Pokémon GO-manie et slimst was.

Dreemoal roaden wee as der an et woard was toen as Solberg drok was to catch ‘em all? Juust, Grande zelf.

@eivindtraedal @erna_solberg hun hørte nok hva jeg sa 😉 vi damer klarer to ting samtidig veit du.

Grande kon der zelf wal umme lachen en tweeten: “Zee heurn genog van wat ik zea. Vieleu vrouwleu köant twee dinge tegelieke, wee’j wal.”

Volgens et Noorske TV2 zea Solberg: “Ik deanke at Trine et wal kan lieden det ik et spölleke lösdeed toon as zee doar steund.”


Duur Elena Cresci
Woonsdag 5 oktober 2016
Welle: TheGuardian.com

Seempele oplössing vuur rap roondgoand Facebookvirus

© ANP XTRA
© ANP XTRA

Der geet een virus roond via Facebook Messenger, meeldt de Zweedse kraante Aftonbladet. Duur et virus spam iej aanderen met nen link, leut Metro verleden April al weten, toen as et virus vuur et eerste vuurbie köm. Non dok et wier op.

Toch kön iej der wat tegen doon, skriewt de Zweden.

 Et virus geet wiedter duur Facebook’s kuierappken Messenger. Doar krieg iej een bestaand met naam ‘video.html’. As iej det lösdoot, kom iej terechte op ne webstea denop YouTube lik, bie ne video met naam ‘(18+) video’. Vuurdet iej den video köant bekieken, wörd oe vroagen um een oetbreading oet Chrome’s webstore te halen wat 45to75 het. Det mu’j vanzelfs neet doon, want dan trek iej et virus binnen.

Vortkriegen

De Chrome-oetbreading is inmiddels oet de webstore vort. Heb iej et virus toch te pakken, dan kriegt oewe FB-möage van oe nen oproop noar et virus. Toch kön iej et heel makkelik wisken.

Zo doo’j det bie Windows-masjienes:

1. Sloett Chrome

2. Zeukt op oewe harde skiewe dissen folder op: C:\Users\OEWBROEKERSNAAM\AppData\Local\Google\Chrome\User Data\Default\Extensions\

3. Smiett den map vort met den naam: ckodnnokennobkojocomngeambodkfok

4. Start Chrome wier op en skriewt et volgende in den adresbalken: chrome://Extensions

5. Kiekt of de oetbreading 45to57 der tusken steet. As det zo is, klikket dan op et askenemmerke wat der nöast steet um et vort te smieten. – doarnoa mut iej et vanof trad 1 nog es duurlopen. As et der neet mear steet, is et vort.

Zo mut et bie Mac:

1. Sloett Chrome

2. Klikt op et vergrootgleaske rechtsboawen, skriewt ‘terminal’ en drukt op enter.

3. Nemt den volgenden tekst oawer en plakket ne in et veanster:
rm -rf ~/Library/Application Support/Google/Chrome/Default/Extensions/ckodnnokennobkojocomngeambodkfok

4. Drukt op enter – et virus wörd non vortsmetten.

5. Start Chrome wier op en skriewt dit in den adresbalken: chrome://extensions/

6. Zeukt den oetbreading 45to57. As det zo is, klikket dan op et askenemmerke wat der nöast steet um et vort te smieten. – doarnoa mut iej et vanof trad 1 nog es duurlopen. As et der neet mear steet, is et vort.


Duur Malin Wigen
3 oktober 2016
Welle: Aftonbladet.se

Noord-Korea verböd sarkasme. Zoonder gekhead.

Et dak geet der of as Kim Jong-oen der bie is. (foto: Reuters)
Et dak geet der aait of as Kim Jong-oen der bie is. (foto: Reuters)

Den Onmeundig Groten, Verhewenen Leader van Noord-Korea, Kim Jong-oen, hef een verbod op sarkasme ofkoondigd. Zoonder gekheaid. Hee zol bange wean at leu met öar “joajoa” toch heel wat aanders bedolen.

Et skient at de oetdrukking ‘nen koezen den as neet weet wat der in de wearld gebuurt’ duur Noord-Korea geet.

Doarumme hef Noord-Korea de leu verböaden um in et dagelikse leawen sarkasties te kuieren oawer hemmelskeend Kim Jong-oen en zinne strakke regearing.

Zelfs met indirekte anmaarkingen op de ongekeande superregearing mu’j rechtevoort met oetkieken, loat verskillende Aziatiese mediastasjons weten.

Met ne riegel massale vuurlichtingsoawende wörden de leu gewoar maakt at ze aait de gode dinge mossen zeggen oawer de stoatstop.

“Een bevealigingsambtenaar organiseren zelf ne biejeenkomst um de leu te woarskouwen tegen meugelike ‘kwoade haandelingen’ duur inheemse opstaandigen,” zea ne welle in de proveensie Jagang tegen Radio Free Asia’s Korean Service.

“De leazing köm der op dale de’j mer better oewen moond dichte konnen hoolden.”

De woarskouwing wör der ook in de angreanzende proveensie Yangang oetdoan, leuten wellen weten.

De beambten zeaden at sarkastiese opmaarkingen as “et is allemoal Amerika’s skoold” as zwoaren kritiek op de regearing zol geelden.

“De gewoonte van de stoatstop um aandere laanden as skooldige an te wiezen as et probleem oawerdudelik aargens aanders ligt, hef der vuur zorgt at inwonners de Partieje der duur haalt,” zea ne naamloze welle.

Ne aandere priezende oetdrukking, “nen koezen den as de boetenwearld neet zut”, skeen ook roond te goan. Et is ne verwiezing noar Oonzen Verlechten Leader, den as zik slim ofzeundert.

De zinsnede köm töt leawen toen as beambten zik der met skrik oawer oetleuten at Menear Kim neet bie vieringen in Ruslaand en Sjina was um et eande van den Tweeden Wearldkrieg te herdeanken.

Strekmedia hebt et van ne tooname in openboare ongeheurzaamhead. De leste paar wekken is der al twee moal beleadigende graffiti oawer de regearing en Kim Jong-oen antröffen.

Noord-Korea -Ho! et is de Demokratiese Volksrepubliek Korea!- hef de leste tied vaker met bummekes spöld, um de atoomspierballen van et laand te teunen.

Kim Jong-oen is nen mooien kearl. Hee leut vanear nog twee kearls ofsketen met een luchtofwearkanon. Den enen was in den sloap evöllen bie ne biejeenkomst van den Koreaansen topkearl. Den aanderen “köm te kort bie” Kims plaatse.


Duur Harriet Agerholm
8 september 2016

Welle: Independent.co.uk 

USA-niejs: Gef Donald Trump et op?

De Amerikaanse republikeinen bekiekt de meugelikheden as Donald Trump opstapt. (foto: wonkette.com)

Bie wearldsproake veende vie et Noorske woard vuur verkiezingen wal toopasselik vuur et Amerikaanse circus: walg. Toch is dit niejs te mooi um neet te delen.

De tegenweend wörd verdan staarker: vuuranstoande republikeinen doot zoonder skaamte waarven vuur demokrate Hillary Clinton. De anklachten oet et boetenlaand wörd alle deage heftiger. Non vroagt de media zik openlik of: löt Donald Trump de moodvearen hangen?

Noa at hee moandenlange in den anval was, geet zik Donald Trump inenen op meardere peunten verdeadigen. De hoge hearen van de republikeinen, woervuur as zik Trump in november presideantskandidoat stealden, doot volgens den umroop ABC News drok disteren oawer wat der mut geburen as Trump, den as bekeand steet um zin dunne velleke, nen trad terugge dut as kandidoat.

Den niejsten anval köm oet Paries. Een antal van Trumps “oetspattingen geewt oe et geveul det iej der ene worgen weelt,” zea Fraankrieks presideant François Hollande. Hee dolen doarbie op “kwetsende en nearbugende” oetloatingen van Trump tegenoawer de oolders van Humayun Khan, nen Islamitiesen VS-soldoat den as in den Irakkrieg umme kömmen was. “As de Amerikanen Trump kiezet, zal det gevolgen hebben, want ne Amerikaanse keuze is ne wearldwiede keuze,” zea Hollande.

Skaarpe kritiek oet et boetenlaand

In de leste moanden hebt ook aandere stoats- en regearingsleaders zik ongewoon skaarp oetsprökken oawer den republikeinsen koartrekker. Den Meksikaansen presideant Enrique Peña Nieto zea at Trumps “vrömdenhatelike oetsproaken an dee van Hitler en Mussolini heugen.” Hee bewearden dan later at zinne wöarde “oet et verbaand trökken warren”, mer toch. Nieto maken bie geleagenhead toch nog wal eawen dudelik at zin laand ondaanks Trumps oetsproaken “op gin eankele wieze” vuur ne mure betalen zollen, dee as Trump tusken de beaide laanden bouwen wil.

De Britse premier Theresa May neumen toen as zee nog binnenlaandsminister was, ne oetsproak van Trump “onzin”. Hee bewearen at de politsie een bepoald stadsdeel in Engelaand neet mear indörven. Zin idee vuur een reaizeverbod vuur Moslims was “taargend, verkeerd, en nutteloos”. Den vurigen bewonner van Downingstroate Nr. 10, David Cameron, beskreef de plannen as “dom”. De Duutse boondskaanslerin Angela Merkel heuld zik oawer Trump oardig stille.

Skaarpe kritiek oet de egene partieje

Ook in et egene republikeinse kaamp mut Trump et lieden. Miljardearsmöatje en Ex-Hewlett-Packard-Sjef Meg Whitman, dee in 2010 ne poging deed um gouverneur van Kalifornië te worden, geet de demokratiese presideantskandidoate Hillary Clinton -neet Trump- nen fleenken baarg met seanten tooskoewen.

Met den Niej-Jorksen Richard Hanna keundigen ook den eersten republikeinsen kongresofveardigden zinnen stem vuur de demokrate an. De leading van de republikeinen hef et zoer non as Trump angewen hef at hee den sprekker vuur et Hoes van Ofveardigden, Paul Ryan, bie de interne partiejverkiezingen neet zal oondersteunen bie den zinne herverkiezingskampanje in zin kiesdistrikt.

De partiejenleaders zollen zo “frustreerd en aargerd” wean oawer Trumps “onnoavolgboare gedrag”, det ze oawerlegd zollen hebben vuur et geval zik den huuzemagnaat inenen terugge zol trekken, volgens ABC. Trump ligt in peilingen achter op Clinton. Op den lesten knieperd nen vervangenden nomineerden andreagen kán, mer is wal lastig.


Duur Ansgar Graw
3 augustus 2016

Welle: Die Welt

Meaning: Lembörgs en Saksies verdeent aparte stea in de nieje mediawet

Eankel een kort berichtken op Totaal TV van 9 meart 2016 dut der van: allene et Freesk krig ne aparte stea in de nieje Mediawet van Stoatsekretoaris Dekker. Limbörgs en Nedersaksies visket wier es achter et net.

Stoatssekretoaris Sander Dekker.

Wat hef det vuur gevolgen? Duur de nieje mediawet zitt alle ummeropen oet alle strekken van Nederlaand in enen road. Dee kriegt nen budel met seanten vuur programma’s, dee as ze oonderling verdelen mut. De Freeske ofveardiging krig ne biezeundere stea, umdet dee toovallig ne heugere sproakstoatus in Nederlaand hebt. Zee köant dus deper oawer de toafel lönnen as der oawer de verdeling van de seanten kuierd wörd.

Dus puur umdet de Freesken in et verleden mear met nen voest op toafel höwwen en de regearing doodestieds dan mer ne haandtekenige zat hef. De beade aandere inheemse sproaken van Nederlaand komt hier liek zo good vuur in anmaarking.

Toch geet et neet duur. En det hef wier gevolgen vuur et anzeen van oonze sproake.

Et krange is det et duursnee anzeen van et Saksies en Limbörgs lege blif um aait wier etzelfde deankbeeldige kringske:

1. Umdet ze ginnen heugeren stoatus hebt in et Europese Haandvest vuur Streksproaken, kriegt ze nooit ne biezeundere stea in de media. Doarduur roopt de onwetenden: “Zee’j noe wal? De medialeu veendt et ginne oetzeunderlike stea weard. Dus zal de sproake meender weard wean.”

2. Umdet ze ginne bettere stea kriegt in de mediawet, stoat ze ook neet op de lieste vuur stoatusopheuging vuur et Haandvest. Onwetenden roopt dan: “Zee’j noe wal? Skienboar is der ginne spesjale stea neudig vuur dee sproake, want ook in de media doot ze der niks met.”

Meteen keump doar dan disse kreenksprekkerieje op: “iej köant toch ook wal Hollaands?” Joa, mer pas noadet ik en mien volk edwungen zeent um det te learen. Mooi makkelik zeggen, dan. En doarbie, de meeste leu köant ook wal Engels, mer toch heurt ze zaken gearne in öare egene sproake. Zo geet den non ook met Saksies.

De readen at Minister Plasterk ginnen heugeren stoatus tookennen wil, is det hee zik bangt at de Saksen en Limbörgers ook rechtshulpe en aandere offisjele zaken in öare sproake ofhaandelen weelt. Det zol tevölle kosten.

Minister Plasterk. (foto: refdag.nl)

Wat Plasterk doarbie verget, is det oonze sproake (of wat vuur aandere sproake dan ook) gewoon recht hef op gelieke behaandeling, ongeacht wat vuur ne erkenning of et in een of aander Haandvest hef. Dee seanten zeent oonze sproake dus joarenlaank achter eheulden. Vie hebt dus nog heel wat te good. Loat mer kommen!

Limbörg en Oaweriessel weelt biezeundere plaatse in nieje Mediawet

Stoatssektretoaris Sander Dekker.

Nöast Freeslaand weelt ook Lembörg en Oaweriessel at öare proveensiale ummeropen ne biezeundere plaatste kriegt in de nieje Mediawet. Det is te leazen in nen breef wat de proveensies noar den Eersten Kamer esteurd hebt.

1Limburg skrif at de proveensies ne mediaroad weelt, dee as de lokale kultuur en indentiteat bewoaren mut. Oawer Omrop Fryslân hebt de Freesken verleden wekke al een verzeuk insteurd um ne oetzeunderingsplaatse te kriegen. Den ummeroop wil det um de Freeske sproake. Et hef gode kaans van slagen.

Lembörg en Oaweriessel weelt dee spesjale stoatus ook in de nieje Mediawet. Ze haalt hier et Europese Haandvest vuur lokale sproaken bie, woer as Nederlaand ook ne haandtekening oonder zat hef. Doarin wordt Limbörgs en Saksies beade as lokale sproake anwezen. In den breef skriewt ze at de regionalle ummeropen ne “slim belangrieke rolle innemt bie et vaste hoolden en anjagen van de sproake”.

De Eerste Kamer kuiert disse wekke oawer de Mediawet. Stoatssekretoaris Dekker hef al verskeaidene stäpkes terugge mutten doon um den wet der in den Tweeden Kamer duur te kriegen. Ook in den Eersten kamer mos hee der al wat bie doon.

Dekker wil gearne at alle proveensiale ummeropen ansteurd wordt vanoet enen road. Leu oet den Eersten Kamer zeet det neet zo zitten en weelt eerst bepoalde beloftes van den stoatssektretoaris, vuur at ze der joa op zegt. Et geet der öar vuural umme det de ummeropen zelf magt bliewen bepoalen wat ze weelt oetstroalen en oetzeanden.

Den Eersten Kamer kuiert der moarn oawer wiedter.


Welle: http://nos.nl/artikel/2091341-ook-limburg-en-overijssel-willen-uitzonderingspositie-in-mediawet.html

Sproakerkenning: wat is der non feaitelik bekuierd in Grönningen?

Vuur Radio 1, RTV Noord en verskeadene aandere media gung et der verleden wekke van. Der warren wat hoge leu oet den Europesen Road in et Grönningse Proveensiehoes um de erkenning van et Saksies te bekuieren. Mer wat is doar non feaitelik ezegd?

Et proveensiehoes van Grönningen. (foto: wikipedia.org)

Op de webstea van et SONT, wat steet vuur de machtig Saksiese naam Samenwerkende Organisaties Nedersaksische Streektalen, steet ne lappe tekst in versaksiest Hollaands oawer wat der allemoal bekuierd is en wee as der bie warren. Et is froai lastig umskrewen. Doarumme hier ne herskriewing:

Achtergroond
Op deenkseldag den 1sten meart kuierden nen koppel leu dee as goat oawer et Haandvest vuur Lokale Sproaken met de verskeaidene groepen dee as zik gangs hooldt met et Saksies. Vie warren neet oet eneudigd.

Oonderwaarp
Wo geet et met et Plat?

Readen
alle 3 joaren hooldt ze in Europa et Haandvest tegen et lecht en kiekt ze wat der aanders mut en of der sproaken bie op mut.

Anwezigen
Van den Europesen Road warren der bie:
-Vera Klopčič (vuurzitter; oet Slovenië)
– Päivi Majaniemi (oet Finlaand)
– Marieke Sanders-Ten Holte (oet Nederlaand)

Vanoet de Saksiese Beweaging warren ze der vanoet zowat alle strekken bie.

Verloop
Eerst meug SONT-vuurzitter Hans Gerritsen wat zeggen. Hee deed verskeaidene zaken oet de deuke:

SONT-vuurzitter Hans Gerritsen. (Foto: sont.nl)

1. De lokale besteurders (NGOs, gemeentes en proveensies) en verskillende ministeries köant mekoar de leste dree, veer joar nog aait neet de haande doon oawer et tookennen van deel III van et Haandvest.
2. Et oawerleg met et Binnenlaandsministerie löp de leste tied good. Ze kuiert oawer ne aandersoortige erkenning, lös van et Haandvest.

De verskeaidene sproakgroepen meugen doarnoa öar zegke doon.

Aktiviteaten

Vera Klopčič. (foto: rtvslo.si)

Vuurzitster Vera Klopčič van den Europesen roadsofveardiging leup de verskeaidene aktiviteaten (en problemen) langs dee as op alle sproakterreinen vuurbie komt: et oonderwies, de media, et sosjale leawen, en zo wiedter. Vuural op kultureel vlak en ook wal in de zorg wörd der völle met de sproaken doan. Et Stellingwaarver vuurleasprojekt wör eneumd. Wiedters bespreuk Klopčič et gebroek van Saksies op de legere skolen.

Geeldzaken
Vuural et verloop van de geeldzaken kan nog heel wat better. Der wörd non allene geeld egewen vuur lösse projekten. Volgens de Zwolse Iesselakademie kö’j doarduur nooit gröttere projekten anpakken, gin kennis van zaken opbouwen en det ook neet vaste hoolden.

Zörgen oawer Geelderlaand
Alleman maakt zik zörgen oawer Geelderlaand. Doar dut de proveensie al nen helen tied niks vuur et Saksies en vuur et Erfgoedcentrum Achterhooks en Liemers (ECAL). De ummeropen RTV Drenthe en RTV Noord doot der mangs wal wat an, mer det kan nog better. In Oaweriessel is et hoaste niks en in Geelderlaand nog meender. Doar zeent de leu ook oardig vergreld oawer.

Lechtpeunten
Mer der zeent ook mooie zaken. Leu hebt verdan mear achting en weardering vuur de sproake. Det har de ofveardiging ook al vernömmen. In zuudoost-Dreante is der bievuurbeeld een oonderwiesprojekt vuur Dreants en Duuts. Der wörd ook oardig wat Plat in de muziek, beuke en kraanten ekuierd.

En non?
De ofveardiging geet der de kommende tied met an den gaank en skrif een verslag. Det legt ze dan vuur an Ministerroad en de Road van Europa. Dee nemt et oawer, stelt ne lieste met roadgewing en anbevelingen op en brengt det noar de Nederlaandse Rieksoawerhead. Dee leste groep mut zik der oawer oetsprekken noar de Road van Europa en et egene parlemeant.

KWW, dus.


Welle: http://sont.nl/index.php/item/10-nieuw

Europa dech noa oawer opheuging anzeen Saksies

Oorsproonkelik stukke: Johan de Veer
1 meart 2016

Minister Plasterk is tegen. Foto: archief dvhn / anp

Ne waarkgroep van de Road van Europa is deenkseldag in et Noorden van Nederlaand um te kuiern oawer de Europese stoatus van de Saksiese sproake.

De vuurvechters van de Noord- en Oost-Nederlaandse sproaken hopt hiermet nen fleenken trad te maken. Seend 1997 zeent ze al gangs um Saksies oonder deel III van et Haandvest vuur Europese Sproaken te kriegen. Hiermet köant sproakorganisasies vroagen um laandelike en internasjonale subsidies.

Oet de studie Nedersaksisch waar het kan van de Rieksuniversiteat van Grönningen (RUG) blik det et Saksies, woer as Drèents, Grönnings en Tweants oonder vaalt an 37 eisen voldut vuur heugere erkenning. Det is mear as genoog vuur dee heugere erkenning.

Riek wil der neet an 

Et binnenlaandsministerie wil neet an dee internasjonale stoatus vuur et Saksies. Verleden joar veund minister Ronald Plasterk ne bloots laandelike erkenning nog zat vuur bettere samenwaarking. Plasterk wol kuiern oawer de wieze woerop at et gebroek van de sproake anjaagd worden kan.

In Nederlaand kuiert 2,5 miljoen leu Saksies. Et riek wil neet an de heugere erkenning, want dan mut der wetten en regels anpast worden en det kost knaken. De proveensie Dreante, dee rechtevoort vuurop löp met de Saksiese zaak, keump det duur et geknooi wat et riek non met Freesk hef, wat al ne riekssproake is.

Volhoolden

De vuurvechters geewt doarumme nog neet op. De Samenwerkende Organisates in het Nedersaksisch Taalgebied (SONT), de proveensies Dreante, Grönningen, Oaweriessel, Geelderlaand en de Freeske gemeentes Oost- en Weststellingwaarf weet at et ne zaak van volhoolden is.

De Grönningse ofveardigde Fleur Gräper (D66) wil de joelstemming oawer et tweedaagse bezeuk toch wat sussen. De Road van Europa hef oawerheden en sproakenkenners oet eneudigd. “Et is ja mooi, mer et geet mear oawer waarkwiezes. Vie weelt ne oawereenkomst sloeten woermet as alle partiejen oet de veute köant.”


Welle: http://www.dvhn.nl/groningen/Europa-overweegt-extra-status-Nedersaksisch-21154264.html

Facebook hef nieje knöpkes

Facebook gef woonsdag ne nieje wieze van reageren vriej. (Foto: Facebook)

Vanof woonsdag den 24sten februwoari hef Facebook ne nieje wieze van reageren invoord. Iej hoowt non neet mear eankel een duumken te gewen, mer köant oet verskeadene stemmingen kiezen.

Vanof woonsdag
In öar blog löt et grötste sosjale netwaark van de wearld weten at alle aanderhalf miljard Facebookers vanof woonsdag de nieje knöpkes kriegt. Et kan eawen doeren vuurde’j ze zeet.

Zes knöpkes
In stea van et oolde duumke he’j rechtevoort keuze oet zes emotikons, woermet a’j alle geveul bie nen post angewen köant. Nöast et duumken kö’j non ook teunen de’j et grappig, verdretig, helligmakend of ongeleuflik veendt. Ook kö’j der een härtjen toozetten.

Passen neet aait
Facebookers wollen al earder wat mear geveul können teunen, want een duumke passen neet aait bie de oard van et bericht. Facebook hef det lange tegen eheulden, mer zea an et eande van 2014 det ze der oawer noa dachten.


Welle: http://www.nu.nl/internet/4219980/facebook-rolt-nieuwe-like-knop-met-extra-reacties.html