China blokkeert Wikipedia
Up et chineeske vasteland is Wikipedia seyt april in gin enkele språke meyr te besöken, hevt de Wikimedia Foundation bevestigd.
Undersökers van Internetcensüür untdekkeden dat Wikipedia nu by up de lange lyste steyt van untogankelike websteades in China.
Et land had al de chineeske variant van de websteade blokkeerd, mär dat is nu uutbreided når alle språkvarianten. Wikimedia segt dat se ginne wårskouwing vöäraf kreagen hebbet.
In ne persuutgave löät de stichting weaten dat “de Wikimedia Foundation eand april vaststelden dat se nit länger togankelik sint in China. Nå ne grundige beskowing van unse interne rapporten van internetverkeer köänet wy bevestigen dat Wikipedia up alle språkvarianten blokkeerd is.”
Ouk de neadersassiske Wikipedia kan vanuut China nit meyr bekeaken worden.
Baike
Volgens vpngids.nl is China al länger gangs üm nit-chineeske websteades te blokkeren en te vervangen döär eygen, ståtsreguleerde varianten. De chineeske vervanger van Wikipedia is Baike, ne uutbow van de chineeske söökmaskine Baidu. Et groute verskil tüsken Baike en Wikipedia is dat den eyrsten slimmen selvcensüür topasset. Allens wat as anmarkingen up de chineeske regeyring kan worden upvatted, wördt vorthaald.
Umseilen
Internetters in China köänet noch altyd med ne VPN-verbinding üm de blokkades hen, mär ouk dat wördt vöärtan lastiger. China blokkeret steyds meyr VPN-anbeders.
